KUCHING: Palan Pemansang Menua Pesisir (RGC) di Long Lama, Baram deka majak dikemansang ti mega nyadi siti ari chara ngerembaika sosioekonomi ba kandang menua nya.
Sapit Kepala Menteri, Datuk Amar Douglas Uggah Embas madah, RGC di Long Lama deka majak dikemansang ngambika nyadi palan ngemansang dalam bungkur ejensi Pemansang Tanah Tinggi Sarawak.
Kandang menua nya bisi endar jalai ngemansutka utai tanam baka sayur setanding enggau tanah tinggi Cameron Highland ti ulih nembus makit antarabansa.
Ku iya, perintah nengeri deka ngatur perambu ke dibantu RECODA (akaunsil Pemansang Koridor Pelilih) Sarawak kena Hari Tiga minggu baru.
Nya deka begunaka perambu ti silik dikena nentuka RGC Long Lama ulih bejalaika pengawa enggau manah di menua pesisir laban kandang menua nya deka dikemansang enggau teratur kelebih agi ngemansangka kandang menua nya dalam sektor ekodagang temuai, ku iya.
Iya bejaku munyi nya lebuh ke nutup Pengerami Lumba Ai Long Lama sereta ngintu Penumbuh Kedua Pelilih Telang Usan di Dewan SJKC Tee Long Lama Baram, Miri, kemari.
Ku iya, nya baka ti diperambu Kepala Menteri Datuk Patinggi Abang Johari Tun Openg ke deka nentuka nadai kandang menua disisih ari pemansang ti dipejalaika perintah Barisan Nasional (BN).
