KUCHING, 26 Julai: Perintah Sarawak udah berengkah ngaga Projek Taman Industri Sri Aman ba tanah pemesai 5.5 hektar.
Sapit Kepala Menteri Datuk Amar Awang Tengah Ali Hassan madah projek nya udah dikemendar ba Atur Pemansang Malaysia Lumpar Ke-11(RMK11).
“Projek tu dikena mantu orang dagang mit sereta jelan pemesai kelebih agi sida di Simanggang ngambi ulih bejalaika pengawa dagang enggau lantang,” ku iya.
Awang Tengah mansutka jaku nya ba aum pengarang berita ba penemuai kereja ngagai palan Projek Taman Industri Sri Aman kemari.
Nitihka penerang iya, renggat keterubah projek ke mungkur pengawa ngaga 21 lot palan industri urung 20 kilometer penyauh ari pasar Simanggang udah tembu ba bulan September 2019.
Ku iya ke mega Menteri Dagang Antarabangsa enggau Industri, Terminal Industri enggau Pemansang Orang Dagang, renggat keterubah nya begunaka ungkus RM5 juta.
“Ungkup renggat kedua, projek meratka pengawa nyendia infrastruktur nyengkaum parit, jalai alun, bekal ai, telekomonikasyen sereta bekal lektrik.
“Pengawa ba renggat kedua tu disadang tembu digaga ba bulan September 2021 lalu begunaka ungkus RM8.6 juta,” ku Awang Tengah.
Kemari mega, Awang Tengah bisi nemuai ngemata pejalai projek Waterfront Lingga.
Nitihka penerang iya, projek ti begunaka ungkus RM3.9 juta nya disadang tembu ba bulan Mei 2021.
Bela nyempulang iya ba penemuai kereja nya ADUN Batang Ai Datuk Malcolm Mussen, ADUN Lingga Simoi Peri enggau ADUN Simanggang Datuk Francis Harden.-DayakDaily
