Pustaka ngatur Festival Nembiak Mit Sarawak April 21- 22

Pustaka Negeri Sarawak logo. (Photo source: www.pustaka-sarawak.com)

KUCHING, April 19: Pustaka Negeri Sarawak (Pustaka) deka ngatur Festival Nembiak Mit Sarawak 2018 kena April 21-22 berengkah ari pukul 10 ngagai 5 lemai, ditu.

Festival dua hari berunggu diatur ungkup nembiak mit ke beumur 4-12 taun.

Ku penerang media kemari, festival nya dipelaba deka mai penulis, ilustrator, penyair, artis, saintis enggau librian ngambika berandau sereta bekunsi penwmu sereta mantaika teknologi ngagai nembiak mit enggau sida sebilik.

Objektif festival deka ngerami pengaga macha, ngemaru sereta ngelaku seni nusi cherita sereta ngemansangka penegap runding enggau pengelandik bejaku nembiak mit ba mua mayuh.

Festival nya diatur begulai enggau Kedutaan Amerika Syarikat Kuala Lumpur, SEDIDIK, Wildlife Conservation Society, Sarawak Eco Warriors, Ika Picture Story House, Kiddo Science Tabuan Tranquility, Flint & Steel Borneo, IntoDesign Lab, Little Entrepreneurs, Digital Economy Hub, Miss Voon Siok Hui enggau Sarawak Youth Jam and AVL.

Mayuh bengkah program diatur baka penyerita entarabansa, eksperimen sains, mantaika guna jaku enggau muzik, woksyop seni enggau kraf, aktiviti bekaul sains, teknologi engineering, sastera enggau matematik ( STEAM), Penyedar Eco, Penyelak 3D, main asal, beperindang enggau bemacham agi.

Sama bisi diatur pemandang bup, barang asil pengelandik jari ke tau dibeli enggau bemacham bansa bansal sereta trak pemakai ti nyual pemakai enggau ai irup.

Festival nya dibuka ngagai semua sereta nadai bebayar.

Sebarang tanya tau dikenatai ngagai Razak Rambili nengah lumur 082-442000 sambung 348 tauka email ngagai razak@sarawak.gov.my tauka Melinda Siew nengah lumur 012-3092621. — DayakDaily