KUCHING, Feb 28: Presiden Parti Rakyat Bersatu Sarawak (SUPP) Datuk Dr Sim Kui Hian kemari nimbal berita selebubu ti madahka Sapit Presiden Parti Datuk Seri Richard Riot Jaem deka ditingkil ari nyadi chalun ba Pengaaa Bepilih Besai ke-14 (PRU14).
“Pengawa Bepilih Besai deka diatur enda lama agi lalu kitai nadai awak agi deka ningkilka sesapa lalu kami patut bekerejasama ngambika kering napi PRU.
“Kami ukai semina dekaka SUPP aja nyadi kering, kami mega deka ngaga politik Sarawak kering,” ku Dr Sim ke mega Menteri Perintah Kandang Menua enggau Pengawa Berumah Kerajaan Sarawak.
Riot, 66, ke mega Menteri Pengatur Pengereja Pengawasereta Kaban Parlimen Serian, diberita ditingkilka ari nyafi chalun ba PRU14.
MP enam penggal nya nyadi pengari rayat tunggal SUPP ba Parlimen, pengudah iya mujur ngetanka Serian, kerusi menua pesisir Dayak, ke alai semina gegelik siti kerusi nya dimenang SUPP ari tujuh ke alai bediri minta pilih ba PRU13, kelimpah nyadi sapit presiden ukai Cina keterubah parti.
Ditanya sentang ulah digaga seraban orang ke repik ari SUPP, Parti Rakyat Bersatu (UPP) ti bela nuntut tujuh kerusi parlimen nya, Dr sim madahka kerusi nya endang kerusi asal SUPP lalu parti bukai enda tau nuntut nya.
Kelimpah Serian, enam iti agi kerusi bukai endur SUPP bediri minta pilih ba PRU ke sebedau tu iya nya Bandar Kuching, Stampin, Sibu, Lanang, Sarikei ke alai semua nya dimenang DAP lalu Bandar Miri dirampas Parti Keadilan Rakyat.
Semua kerusi terbabit ba mengeri ti diuan majoriti Cina.
“Kepala Menteri (Datuk Patinggi Abang Johari Tun Openg) ba pengerami merarau beserimbai enggau ngintu Taun Baru Cina ke diatur SUPP empai lama udah madahka diri dekaka SUPP ngulihka pulai kerusi Lanang enggau Sibu, lalu tu nyata mandangka iya empu dekaka SUPP bediri minta pilih ba kerusi nya,” ku iya.
Berebak enggau nya, iya madahka sesapa ti bisi ati bediri minta pilih ba tujuh kerusi nya nguna lambang BN meseti nyadi chalun SUPP. — DayakDaily
