Dikarang Chris Bishop
KUCHING, 25 Ogos: Sapit Kepala Menteri Tan Sri James Masing ngelalau rayat beambi ulih ari atur perintah ti ngaga jalai alun nyambung tetiap menua ngagai menua bukai.
Bejaku ba program penemuai Kepala Menteri Datuk Patinggi Abang Johari Tun Openg ngagai Projek Jalai Ulu Suai di Niah seharitu, Masing madah projek ngaga jalai mansa sereta muka mayuh tanah baru ke tebal agi diempu rayat.
“Jalai tu digaga ngambika pejalai kitai ke Miri, ke Bintulu tauka ke Sibu manah agi.
“Tang kita ke ngempu menua baka sida Iban, Melayu sereta Kedayan ditu mesti ingat, jalai tu ukai semina ngemudah pejalai entuka aja.
“Jalai digaga awakka tanah kita dipansa jalai, ari nya kitai ulih ngemansang diri. Ambi meh peluang lalu tu meh ke pemadu berat,” ku Masing.
Ba program nya, Masing ke mega Menteri Infrastruktur enggau Pemansang Pelabuhan madah perintah sigi keran deka nyendia infrastruktur ngagai semua rayat Sarawak.
Ku iya, projek Jalai Ulu Suai diperambu 30 taun ke udah tang semina dikemujur diatu asil pemereti Abang Johari ti meretika pinta enggau peneka rayat di Suai.
Masing madah Ulu Suai diwan lebih 3,800 iku orang ti mungkur lebih 600 pintu rumah sereta bisi 4 sekula enggau politeknik.
“Projek tu deka mai penguntung ngagai semua rayat ditu sereta deka ngangkatka ekonomi peranak Ulu Suai kelebih agi raban orang bekebun sawit nengah atur penyambung ke bisi digaga perintah,” ku iya.
Projek Jalai Ulu Suai beungkus RM68 juta digaga nengah teknologi moden ti ulih nyendia jalai ke tegap sereta disadang tembu ba bulan November 2021. — DayakDaily
