KUCHING, 19 MEI: Projek Jalai Besai Kedua deka nyendia sistem penyambung ke engkeman entara Simanggang enggau Betong, ku ADUN Pelagus Wilson Nyabong Ijang.
Nyabong pechaya jalai nya jemah ila ukai semina deka nyendia sistem penyambung, tang deka mega nentuka kandang menua ti jauh di ulu ulih dikemansang.
“Projek Jalai Besai Kedua nyendia sistem penyambung ba kandang menua pesisir lalu ngembuan 2 sektor, ke-satu jalai tu nyambung Sebuyau ke Roban nengah Saratok lalu betemu enggau Jalai Besai Pan Borneo ba pemanjai 65.13 km.
“Jalai kedua nyambung Sebuyau-Lingga-Sri Aman-Betong lalu betemu enggau Jalai Besai Pan Borneo ba pemanjai 142 km,” ku Nyabong.
Wilson ke mega Kaban Kunsil Tinggi Parti Rakyat Sarawak(PRS) madah Projek Jalai Besai Kedua deka nentuka kandang menua pesisir disikap enggau atur penyambung alai ba maya ke diatu bedau digaga jalai.
Pengudah jalai digaga ku iya, bekal lektrik enggau ai beresi ulih disambung ngagai tetiap rumah panjai sereta palan pengentap pendiau.
“Urung 60 peratus peranak Sarawak ke diau ngelingi semua projek infrastruktur tu deka bulih pemaik lalu ngasaika pengelantang.
“Berindik enggau nya, sebarang tuduh ti madah projek tu enda mai penguntung sigi enda betul,” ku Nyabong.
Iya nimbal tuduh ex-sapit presiden PRS Datuk Joseph Entulu Belaun ti kenyau udah nyereta Parti Sarawak Bersatu(PSB) beamat-amat madah duit perintah Sarawak penyampau RM6 biliun patut enda dipebasau projek Jalai Besai Kedua.
Joseph ba penemu iya dekaka duit nya dikena melanja projek nyendia bekal ai beresi, lektrik, servis telefon, arus internet, jalai alun enggau servis pengerai di menua pesisir.
Ketegal nya, Nyabong ngasai Joseph ke kala nyadi MP Selangau sereta ex-menteri ba perintah besai udah enda nitihka pekara pemansang di Sarawak.
“Iya(Joseph) udah nyadi MP kenyau taun 2004. Iya enda nemu pinta enggau peneka rayat sereta kebuah perintah Gabungan Parti Sarawak(GPS) merambu ngaga semua projek tu,” ku Nyabong.
Ku Nyabong agi, enti jalai penyambung entara mengeri enggau menua pesisir tu enda digaga, aktiviti sosio ekonomi enda ulih dikerembai jauh.
Ngambi chunto Malaya ke sama pemesai enggau Sarawak, Nyabong madah sida (Malaya) bisi dua bengkah jalai besai iya nya ‘North-South Highway’ enggau ‘East-West Highway’ sereta East Cost Real Link (ECRL) kelimpah ari jalai bukai ti nyambung siti mengeri ngagai siti mengeri bukai.
“Sekalika semua jalai tu enda diguna? Kitai diatu nanya nama kebuah Malaya jauh mansang ari Sarawak. Maya kitai nyendia perambu ngaga jalai, bala orang politik kitai lalu nanya nama tuju perambu nya.
“Aku minta ngagai sida kelebih agi ti ngelaban perintah GPS, anang mantah projek ke digaga ungkup pemaik sereta penguntung rayat.
“Enti udah nadai buah runding agi, manah agi diau diri,” ku Nyabong.
Iya mega madahka Perintah Sarawak udah nyendia belanja penyampau RM2.8 biliun ungkup prpjek bekal ai sereta RM2.2 biliun ungkup projek bekal letrik di kandang menua pesisir ti disadang tembu ba taun 2025.—DayakDaily
