LAWAS, August 26: Menteri Kereja Raya Baru Bian madahka perintah deka ngaga jalai alternatif ke diperambu ari Miri ke Limbang nengah Long Lama, Marudi enggau Bario, tang enda mansa Brunei.
Baru, ke mega Kaban Kunsil Negeri Ba’Kelalan sereta Kaban Parlimen Selangau, madah pekara nya udah disetuju Menteri Besai Tun Dr Mahathir Mohamad maya sesi meri penerang enggau Opis Menteri Kereja Raya nya, empai lama udah.
“Jalai alternatif nya deka digaga nengah Long Lama, Marudi, Bario lalu terus ke Limbang enggau Lawas tang enda mansa Brunei,” ku iya.
Ku iya baru, nengah pengawa ngaga jalai nya ulih mutarka penanggul baka ngena pasport, ngangkut barang pemakai baka beras enggau ke bukai ti ditapi peranak di Limbang, Lawas enggau Miri ti mansa Brunei.
Baru bejaku munyi nya lebuh ngelancharka projek ‘Lawas My Home’ nyerumba Karnival Belia Lun Bawang ditu kena Hari Lima tu tadi. — DayakDaily
