KUCHING, Nov 6: Menteri Pelajar, Sains enggau Pansik Teknologi Dato Sri Michael Manyin Jawong netapka 113 iti sekula dikandang menua pesisir ulih disambung ngagai grid elektrik.
Iya madah, penerang nya dikeluarka opis pelajar lalu Perintah Negeri sedia nyambung sekula nya ngagai grid elektrik enti bisi pemendar ari Opis Menteri Pelajar.
Ku iya, kabinet menteri Sarawak bedau lama tu tadi bisi ngemendar agih belanja RM59 juta ungkup projek bekal lektrik enggau ai.
Nengah belanja nya, RM50 juta ungkup bekal lektrik enggau RM9 juta ungkup bekal ai ke bekait enggau pekara pelajar.
“Aku udah nulis surat nuju Menteri Pelajar sentang pekara tu alai bisi 113 iti sekula ulih disambung ngagai grid lektrik enggau mudah.
“Kitai meratika isu tu enggau berat lalu deka ngemujur pengawa nyambung enti bisi pemendar ari ijinsi ke bekaul,”ku iya.
Manyin mansutka penerang nya lebuh dirandau di opis iya di Komplek Dewan Undangan Negeri(DUN) di Petra Jaya semalam.
Sekeda pekara ke ditulis Manyin nuju menteri pelajar iya nya bisi 371 sekula dalam kandang menua pesisir di negeri tu mengkang bepanggai enggau genset endur ngulihka kuasa lekterik.
Ku iya, ungkus ngintu pemanah genset di semua sekula nya ungkup timpuh 3 taun aja manggai RM1 biliun.
“Nitihka sempekat ke disain Perintah Barisan Nasional (BN) maya nya enggau kompeni pemekal diesel ke mega ngintu pemanah genset, kuntrek nya (ungkup taun 2017, 2018 enggau 2019) manggai RM1.3 biliun.
“Tu meh isu ke pedis diputar alai opis menteri pelajar dibalut pekara tu,” ku iya.
Nambahka nya ku Manyin, kuntrek semina diberi ngagai siti kuntrektor aja lalu Sarawak nadai sebarang kaul sentang atur nya.
Ungkup taun 2014, 2015 enggau 2016 ku iya, belanja ke dibayar perintah besai ungkup kereja ke sama manggai RM1 biliun tang diberi ngagai 52 kuntrektor.
Dulu agi ari nya, Manyin madah semua pekara ke bekaul enggau pelajar tauka sekula dikuasa Perintah Besai.
Tajapia ku iya, Sarawak enda ngelengkaka pia aja ketegal meretika guna pelajar lalu sekeda bantu ari duit negeri bisi dikeluar. — DayakDaily
