Perintah Negeri keran nentuka semua peranak Sarawak diintu manah sereta berakup

Penyereta forum, raban panel enggau temuai dipebasa begambar bebala mayuh enggau Fatimah (tengah) di SIIC di Kuching seharitu.

Chris Bishop

KUCHING, Mac 18: Kepala Menteri Datuk Patinggi Abang Johari Tun Openg ngelalau peranak Sarawak sama bela ngintu pemaik peranak negeri tu.

Perintah Negeri ku iya meratka pekara nya lalu nyadika kebuah Unit Agama Bukai (Unifor) ditumbuh.

“Kitai ukai semina dekaka muslim diintu enggau manah, kitai mega dekaka pangan kitai ari agama bukai diintu manah nengah reti berakup dalam bemacham bengkah agama,” ku iya.

Abang Johari mansutka penerang nya rambau bejadi ‘Forum Keharmonian’ nengah teks jaku ke dibacha Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah.

Forum ke diatur nyerumba ‘Minggu Keharmonian Antara Penganut Agama Sedunia 2019’ Renggat Negeri Sarawak 2019 diatur di Palan Penerang Islam Sarawak(SIIC) di Kuching ditu, seharitu.

Iya nambah, pekara ke pemadu berat iya nya nempa siti negeri ke lantang endur diau alai rayat ari genap pupu bansa berakup begulai enggau pangan diri.

“Pengeran tu ukai semina dipandang nengah chara ngagihka belanja RM20 juta tauka RM30 juta dikena nirika gerija tauka palan sembiang bukai.

“Ke pemadu berat kitai keran mantu pangan ukai muslim lalu berakup dalam Sarawak,” ku Abang Johari.

Dulu agi ari nya, Chairman ‘Forum Keharmonian’ ke mega Direktor Unifor Datu Dr Ngenang Jangu ba jaku pengelalu madah pengawa ngintu ‘Minggu Agama Keharmonian Antara Agama’ keterubah iya diatur di Sarawak.

Nungkatka rambai jaku ‘Love of God, Love of Neighbour’ forum ku iya ngayanka pengeran perintah ti deka ngerapitka penyerakup rayat.

Forum dikemujur 6 iku raban panel ti ngarika bemacham agama di Sarawak iya nya Balachandran Annamalai (Hindu), Firdaus Wong Wai Hung (Islam), Gurdial Singh (Sikh), Reverend Fr. Felix Au (Kristian), Venerable Bhikkuni Dhammika(Buddha) enggau Chin Chia Chau (Baha’i).

Urung 500 iku penyereta ari mayuh bengkah ijinsi enggau gerempung datai ngulu forum.

Bela datai Menteri Muda Pemansang Orang Indu, Ruang Bilik enggau Anak Mit Rosey Yunus, Menteri Muda Industri enggau Beranakka Puku Malcolm Mussen sereta Moderator Forum Zabariah Matali. — DayakDaily