KUCHING, Mei 26: Perintah negeri deka meri subsidi RM10 ngagai penumpang bot ekspres ti mulaika diri ngintu Gawai ke menua.
Ba penerang media kena Hari Lima, Kontroler Lembaga Sungai Sarawak (LSS) Richard Tajan ngamatka subsidi RM10 nya diberi kelebih agi ngagai penumpang ungkup pejalai bot ekspres tambah ari Mei 25 nyentuk 31.
Ba oenerang nya, Richard madah chara nya diambi pengudah pengemeran bot ekspres di Sibu enggau Kapit nikika tambang ari RM25 ngagai RM35 ungkup pejalai tambah beserimbai Gawai.
Nengah subsidi nya, mensia mayuh ke deka pulai gawai di menua agi mayar tambang ba rega selama iya nya RM25.
Ku Richard, nya meh chara ke pemadu manah dikena nyeliahka pengemeran bot ekspres manipulasi rega tambang ngagai penguna servis bot ekspres maya musim pengerami. — DayakDaily
