KUALA LUMPUR: Kepala Menteri Datuk Patinggi Abang Johari Tun Openg madah, perintah sedia ngakun’ “pemakai menua” enggau “pulau galau”, tang isu reti ke bendar pasal pemesai bungkur tanah nya agi nyadi tanda tanya.
Bejaku ba sesi Karnival Anak Sarawak dalam slot “Santai Dengan Abg Jo” beserimbai enggau Program Lan Berambeh 2017 di Dewan Tun Razak, Pusat Dagangan Dunia Putra (PWTC) empai lama udah, iya madahka semua pupu bansa bisi reti jaku ke bebida sentang dua kategori tanah Hak Adat Bumiputera (NCR) tu.
Ku Abang Johari, bansa Penan, Berawan, Iban nyengkaum Melayu bisi reti kediri sentang tanah NCR nya.
Sekalika reti pemesai bungkur “pemakai menua” enggau “pulau galau” mai reti sepun kayu tauka siti gunung tauka semua kandang endur?
Nya alai, penyaru ba penerang reti bekaul enggau isu nya ku Abang Johari, perintah udah numbuhka siti komiti betuaika Sapit Kepala Menteri Datuk Amar Douglas Uggah Embas ngambika ngiga chara mutarka penanggul nya.
Kelimpah ari penemu bala luyar, chara bukai iya nya ngaul bala ketuai raban bansa.
Seraya madahka isu tanah NCR nya sensitif, Abang Johari, nyerahka pekara nya ba Uggah enggau ketuai Bumiputera ngambika meri lalau ngagai perintah nerangka reti “pemakai menua” enggau “pulau galau”, ngambika isu nya ulih diputar.
