SIBU, Julai 29: Pemati siku pengajar, Catherine Janet Tiwi, ba penusah angus di Sekula Primari (SK) Batu Bungan, Mulu kena Hari Tiga nyin tadi, patut muka mata perintah negeri enggau perintah besai ngambika bekerejasama nyendia sereta ngangkatmanah perengkaguna di semua sekula menua pesisir.
Beduduk ari nya, Kaban Kunsil Negeri (ADUN) Bukit Assek, Irene Chang ngansak Opis Menteri Pelajar negeri numbuhka Komiti Pengerai enggau Pengelikun ngambi bejalaika pengawa nyadi penyanding penemu ngagai Opis Pelajar Perintah Besai.
“Komiti tu meseti disereta raban ke bisi pemerat ari menua tu ngambika bekerejasama enggau opis menteri negeri enggau perintah besai sereta diberi kuasa nyeretai pengawa meresa ninting taun ba sekula nya,” ku iya ba aum media di indu opis DAP Sibu ditu.
Ku iya, maya Aum Kunsil Negeri ke tembu empai lama.udah, Menteri Pelajat, Sains enggau Pansik Teknologi, Datuk Seri Michael Manyin Jawong madahka bisi 428 sekula menua pesisir di Sarawak ke bedau bisi bekal ai beresi, lalu 371 agi mengkang beoanggai ba set injin api dikena ngulihka kuasa elekterik.
Iya mega madah, bisi 1,020 sekula repuk ke nyadi pun penusah baka ke nyadi ba palan nembiak bemalam di SK Punan Ba di Belaga ke runtuh ba taun 2011. — DayakDaily
