Pengawa nguji tikas pengelandik Jaku English patut dipejalaika ba staf perintah pangkat tinggi

Signature. — DayakDaily.com file pic. // Photo: Pixabay

MIRI, Jun 10: Pemutus perintah besai Pakatan Harapan ti dekaka staf perintah ngambi peresa tikas pengelandik Jaku English ungkup pengereja pengawa pangkat tinggi nerima sambut ti positif ari sektor peribit.

Sekretari Besai Malaysia Serakup Hotel Sarawak, John Teo madahka peresa kompetensi nya endang pekara ke patut nyema Malaysia deka besemekih ba renggat dunya.

“Perintah Menua Malaysia patut nyadika pekara tu meseti dipejalai lalu netapka standard ke enda tau diganti nyema deka ngemanahka Jaku English rayat menua tu. Tajapan dalam runding aku, Jaku Melayu (BM) endang udah dituku jaku nasional, tang patut bisi poin nyadika BM ukai jaku keterubah ti meseti pas tang meri ngagai subjek Jaku English.

“Kebendar nya, mayuh rayat Malaysia alah ba renggat dunya ketegal tikas penemu Jaku English sida ti kurang maya sida udah bekereja, taja udah profesional, sida ti manah sentang Jaku English pan enda teulihka kereja perintah. Tu meh pekara ke endang amat nyadi diatu kenyau ari suba, lalu tu meh dikearap kitai patut ditukar perintah baru,” ku iya.

Teo minta Opis Menteri Pelajar patut nyadika pekara tu meseti dalam semua subjek, ari tadika nyentukka tikas pelajar sekula tinggi.

Orang dagang Erik Chin madahka pekara ngangkatka Jaku English tu nyangka deka nyadi pekara ti tusah deka dipejalai, tang ukai utai ti enda ulih.

“Kenyau ari dua nyentukka tiga dekad ti udah, nadai pengawa ti digaga sentang ngangkatka tikas pemanah Jaku English ba rayat Malaysia, ti endang ulih dipeda ba sistem pelajar kitai.

“Nyema perintah baru deka ngangkatka tikas pemanah Jaku English ungkup orang bepangkat tinggi tu rasmi, pengawa tu enda patut diketu laku nangkan ke nya peresa meda tikas pengelandik mega patut dipejalai, baru kitai ulih meda empas ti positif dalam tiga ke lima taun ti deka datai,” ku iya.

Chin mega minta nitihka chara perintah menua Singapura, iya nya nyadika Jaku English tu subjek ke meseti pas dalam peresa, baru ulih ngangkatka standard Jaku English ba rayat Malaysia.

“Nyema sebedau tu perintah udah ngaga BM enggau Sejarah nyadi subjek ke meseti pas, aku amat pechaya nengah chara bansa nya mega ulih ngangkatka rayat nguasa Jaku English enggau efektif,” ku iya.

Iya nambah, sistem pelajar ke terit mega ulih mantu bala apai indai meretika pemanah Jaku English. — DayakDaily