KUCHING, MEI 17: Komiti Pengatur Penusah Ngenyit Sarawak(JPBNS) kena Hari Lima tu tadi udah netapka pengawa ngabang ba pengerami Hari Raya enggau Gawai ti deka datai ditagang.
Chairman JPBNS Datuk Amar Douglas Uggah ba aum pengarang berita bekaul Covid-19 madah, mensia mayuh mengkang saru diak pengawa ngelalu temuai, ngabang ari siti rumah nuju siti rumah dikemendar.
“Aku deka nerangka enggau nyemetak, pengawa begusung semina dikemendar ba raban diri sebilik aja.
“Pengawa begusung tu enda tau lebih ari 20 iku ba siti-siti maya,” ku iya.
Uggah ke mega Sapit Kepala Menteri madah bisi sekeda orang enda meretika jaku tesau iya dulu agi ari tu, alai sida ngasai pengawa begusung ke pangan diri ba pengerami Hari Raya enggau Gawai dikemendar.
Ba sentang isu bukai, iya ke nyadi menteri ti ngemata Unit Hal Ehwal Agama-Agama Lain (UNIFOR) madah JPBNS diatu benung nyendia prosedur operasyen standard (SOP) dikena besembiang ba gerija.
Ku iya, JPBNS benung ngadu kerejasama enggau UNIFOR ngambi ulih nyendia SOP nya enggau lengkas pengudah SOP ungkup raban Islam dibantai.
Uggah madah SOP nya udah diserenih komiti lalu deka dibantai ba awak ke semak tu.— DayakDaily
