KUCHING, Dec 1: Parti Bansa Dayak Sarawak Baru (PBDSB) tekenyit ninga penerang ari Mandal Chairmain PKR Sarawak, See Chee How ti madahka Sekretari Besai SADIA Nicholas Mujah Ason deka nyadi chalun potensi PKR Sarawak ba sitak parlimen P202 Sri Aman.
Nitihka penerang Sapit Presiden PBDSB Patrick Anek Uren, Mujah chalun potensi PBDSB ke alai penerang Chee How balat ngasuh kami alit ati.
Anek melaba Mujah empu enda nemu sentang pekara nya.
Anek nandu, jaku ti dipansutka Chee How tu semina propaganda politik aja dikena narit ati mensia mayuh lalu siti ari chara PKR ngelabuhka populariti presiden PBDSB Cobbold John ba sitak parlimen Sri Aman.
“Cobbold dulu ari tu udah madah iya deka nyatup Datuk Masir Kujat (PRS-BN) ba Sri Aman sereta ngelengka niat ati deka nyatup Datuk Tiong King Sing(PDP-BN) di Bintulu laban meri awak ngagai Dr. John Brian betengali alan”, pia ku Anek.
“Kami mega ninga rita, Masir engka deka diganti enggau Ketuai Bagi Orang Indu PRS Doris Brodie ba parlimen Sri Aman ila”, ku iya nandu.
Cobbold dipeda regas sereta berani amat bejakuka hak Dayak enggau Sarawak sekumbang ti udah megai pangku pengawa presiden parti ari protem presiden Louis Jarau.
Bekaul enggau nya mega, Anek madahka ulah PKR tu enda jauh bida enggau BN sama bela enchadika undi Dayak dikena ngulihka pemujur.
“Anang nyabung Dayak dalam PKR enggau DAP belaya enggau kami (PBDS).
“Kami (Dayak) deka nuju penyerakup politik”, pia ku Anek nyemetak nyebut. — DayakDaily
