MIRI, Okt 27: Pemansang ekonomi nasional begunaka penambah penyampau raban graduate dalam bidang teknikal enggau pengelandik,pia ku Sapit Kepala Menteri Datuk Amar Douglas Uggah Embas.
Ku iya, pengawa ke pemadu mar iya nya nempa pengereja pengawa ti ulih ngisi pinta industri menua ti patut diangkat ngagai Revolusi Industri 4.0.
“Ngangkat manah kualiti pelajar ba bidang pengelandik pattu dikemerat sereta beguna amat ngambika ulih nempa modal mensia ke ngembuan mayuh pengelandik bepenemu sereta beinovatif,” ku iya nengah teks jaku iya ke dibacha Menteri Muda Kunsil Kandang Menua, Datu Dr Penguang Manggil.
Ku iya, Koridor Kuasa Tau Dikena Baru Sarawak (SCORE) muka mayuh peluang gawa ke tau diisi peranak menua Sarawak.
“Pemansang pengereja pengawa patut setanding enggau guna dalam SCORE lalu ba timpuh ke sama ulih ngurangka penyampau pengereja pengawa menua tu ti mindah gawa ngagai menua tasik,” ku iya.
Ku iya baru, perintah negeri udah numbuhka U-SCORE dikena ngelala sereta merambu kus enggau latih teknikal ti diguna dalam industri ke bekaul enggau SCORE. — DayakDaily
