BINTULU, Nov 28: Taja ukai mudah tang Pelilih Sebauh deka majak dikemansang ari sukut penyikap perengka guna enggau infrastruktur ngambi ulih ngelantang peranak menua ditu, pia ku Menteri Bekal Ai enggau Elektrik Menua Pesisir, Dato Sri Dr Stephen Rundi Utom
Ketegal nya ku iya, perintah BN enda mantul lalu projek pemansang nya deka dipejalaika belama nengah chara berenggat, ku iya.
Ku iya, bala ketuai raban bansa kelebih agi nya bala Tuai Rumah meseti nemu program pemansang ti deka dipejalaika ba kandang menua sida ngambika peranak genturung pendiau rumah panjai semampai sedia nerima sesebengkah projek lalu ngambika projek nya mega mujur dipejalaika.
Ku iya baru, semua ketuai raban bansa meseti ngembuan kaul ke rat enggau Opis Pelilih Menua ngambika sida bulih penerang pasal langkar program pemansang ti diperambu ke sida ti tau meri pengelantang enggau pemaik.
Iya bejaku munyi nya lebuh Bejadi Projek Bekal Elektrik, Simpang Masuk Ke Rumah Panjai enggau Rumah Stor Biro Indu Komiti Pemansang enggau Pengelikun Genturung Pendiau (JKKK) Rumah Gani Lansam di Sungai Sebangat, Jalai Sebauh-Bintulu, ditu ensana.
Ku Rundi, Skim Bekal Elektrik Alternatif Menua Pesisir Sarawak (SARES) fasa dipejalaika di kandang menua Binyo enggau fasa kedua (mmengkang ba renggat mansik ) deka dipejalai ba kandang menua bakal Sungai Sigu nyadi bukti perintah bebendar ngemnansangka menua pesisir nengah chara berenggat.
Nya kebuah, sukung ari rayat di Sebauh ngagai Perintah BN beguna amat awakka mayuh agi agih belanja diri ari perintah besai enggau negeri dikena ngemansang Pelilih Sebauh ke nyadi kubu kuat BN. — DayakDaily
