![refuel-2157211_1920](https://i0.wp.com/dayakdaily.com/wp-content/uploads/2017/09/refuel-2157211_1920-e1505612294110.jpg?resize=696%2C462&ssl=1)
KUALA LUMPUR, Julai 25: Perintah dipinta nyerenih baru Akta Pemansang Petroleum (PDA) 1974 ngambika atur pengawa bekaul kompeni minyak enggau gis nasional Petronas ulih dipejuraika di Parlimen.
Datuk Wilfred Madius Tungau (UPKO-Tuaran) madah, nya mega ngambika Petronas ngeriput terus sentang sebarang atur pengawa kompeni nya ngagai Parlimen.
“Laban Petronas diatu diseliah ari ngeriput ngagai Parlimen nya alai Kaban Anggota Parlimen enggau mensia mayuh enda nemu penuduk ke bendar Petronas sekalika ari sukut penyampau pemansut minyak, nama ke nyadi ba kompeni nya, berapa penguntung ke diulih enggau ke bukai.
“Jaku Yang di-Pertuan Agong mega nyebut pekara pengelurus ti dituju ngagai pengawa ngatur oekara wang enggau asil menua. Nya kebuah perambu endang ngena amat ngambika dewan rakyat dipadah sentang pekara tu,” ku iya dalam sesi bejuraika langgur penemu jaku Yang di-Pertuan Agong ba Aum Dewan Rakyat, kemari.
Berebak enggau nya, Datuk Wilson Ugak Kumbong (PRS-Hulu Rajang) lebuh bejurai mega ngarapka perintah Pakatan Harapan beratika utai ke digun Sarawak ngambika sama bela ulih ngasaika pemansang.
“Nyauka 16 tahun kami agi mayuh pengurang kelebih agi ari sukut infrastruktur, nya alai sigi bisi pematut asil pengaya menua ke diulih ari pemansut tanah Sarawak baka minyak dikemerat ngambi dipulaika ngagai rayat negeri tu dulu,” ku iya. — DayakDaily