PBDS Baru ngining penuduk DUN Samalaju

Bobby William

KUCHING, 9 Julai: Parti Bansa Dayak Sarawak (PBDS) Baru dipelaba deka nudukka chalun ba sitak Kunsil Negeri (DUN) Samalaju ba Pengawa Bepilih Negeri ke-12 ti deka datai.

Presiden PBDS Baru Bobby William, nengah surat penerang berita seharitu, netapka siku ari mandal presiden parti disadang deka bediri minta pilih ba DUN Samalaju.

“Endang udah adat demokrasi, nadai salah sereta nadai sebarang undang-undang tau nagang kami nirika chalun di DUN Samalaju,” ku iya.

Tajapan nemu Samalaju siti entara kubu kuat Parti Rakyat Sarawak, Bobby madah PBDS Baru mega ngembuan manuk sabung ke endang sigi asal ari menua nya.

Kelimpah ari nya, ia mega madah PBDS Baru merambu deka nudukka chalun ba semua lapan iti DUN bansa Bidayuh.

“Ba sentang pekara tu, aku nyerahka tanggungpengawa ngagai mandal presiden sitak selatan, Dr Bego Sepop enggau sapit presiden Andrew Puro.

“Seduai (Bego enggau Andrew) deka nguluka parti ‘matak serang’ ba menua Bidayuh. Aku nemu kami mayuh kaban ba kandang menua Mambong,” tandu Bobby.

Ba sentang ex-sapit presiden enggau ex-sekreteri besai, Bobby madahka seduai mengkang tegap begulai enggau parti tang semina deka meri awak ngagai orang ke biak ngiring parti jauh agi.

“Seduai mengkang kaban parti, pia mega kaban kunsil besai ke dulu. Aku nadai penanggul enti sida sama deka bediri minta pilih laban tu ukai parti aku. Tu parti Dayak, lalu bisi ripih undang undang parti ti patut dititihka,” ku Bobby.

Dulu agi ari tu, mandal presiden PBDS Baru sitak tengah, Mejar (B) Moses Ripai, kala madahka parti deka nudukka 38 iku chalun.

Moses empu diberitaka deka nyatup Wilson Nyabong Ijang ba DUN Pelagus. — DayakDaily