KUCHING, Okt 29: Parti Sa’ati Rakyat (SUPP) udah ngatur aum renggat Komiti Kereja Pusat ba Indu opis parti nya ditu kemari.
Presiden Parti Sa’ati Rakyat Sarawak (SUPP) Datuk Dr Sim Khui Hian madah, pampang parti nya di serata negeri Sarawak deka ngatur pengawa bepilih berengkah ari 1- 15 November tu seriris enggau konstitusyen parti nya.
Entara pekara ti dikerandau ba aum nya nyengkaum nyendiaka diri napi PRU14.
Ku iya, parti komponen BN ke bukai bela dekaka kitai menang ba pengawa bepilih besai tu ila.
Nya beguna amat ke pemaik kaban enggau bala ketuai parti, ku Sim.
Lebuh bejaku ngagai raban media nya mega, iya madahka kerusi ti udah diempu Barisan Nasional (BN) enda sekali-kali diserah ngagai parti ke ari luar BN lalu sida deka bediri minta pilih ngenanka kerusi nya.
SUPP ke napi penanggul berebutka kerusi enggau Parti Rakyat Bersatu (UPP) ke sama deka bediri minta pilih ba sekeda kerusi asal ti diempu SUPP nyengkaum ba sitak Lanang enggau Sibu.
Parti Rakyat Bersatu (UPP) betuaika Datuk Seri Wong Soon Koh ditumbuh pengudah parti SUPP pambar ketegal penyarut berebutka kuasa dalam SUPP.
Ba Pengawa Bepilih Besai (PRU13) ke sebedau tu, SUPP udah nudukka chalun ba tujuh kerusi ke diempu parti nya tang alah ba semua kerusi majoriti ke diuan bansa Cina.SUPP semina menang ba sitak Serian nengah pengari sida Datuk Seri Richard Riot Jaem ba sitak Serian. — DayakDaily
