KLANG, Julai 7: Perintah dekaka mayuh agi orang ke bisi ati nyadi pengajar minta ba bidang pelajar khas laban diatu agi mayuh pangku pengawa nya ke puang di serata menua.
Sapit Menteri Pelajar, Teo Nie Ching madahka bidang pelajar khas siti antara sektor ke meseti dikemeratka semua ngambika ulih mantu perintah ngangkatka pemujur enggau ubah dalam pelajar menua.
Ambika banding di Selangor, ku iya, bisi 56 pangku pengawa nyadi pengajar pelaja khas ke puang lalu 207 pangkh pengawa pemantu pengatur nembiak diguna di sekula sekondari enggau sekula primari bansa nya naka ke diatu.
“Penyampau di serata menua, asai aku guna nya (pengajar pelajar khas) tentu tinggi agi. Ketegal nya, perintah meransang orang ke bisi ati nyadi pengajar mgaulka diri ba bidang nya lalu kami tentu deka ngambi mayuh agi pengajar enggau pemantu ngatur nembiak dudi ila,” ku Teo lebuh dikerandau pemberita pengudah ngulu pengerami makai lemai Pekit Lumba Darat Pelajar Khas Renggat Menua 2018, ditu malam ensana.
Dulu ari nya, Teo macha teks jaku Menteri Pelajar Dr Mazlee Malek ti dekaka mensia mayuh nyendiaka ruang enggau peluang ke sama rata ngagai raban nya dikena nentuka sida mega ulih mantu menua. — DayakDaily
