KUCHING, 24 Feb: Ops Iblis di menua dikumbai Hutan Simpan Ulu Kinta, Perak kena 13 Jun 1971 seruran dalam pengingat Renjer Abang Bolhi Abang Doladi.
Ba operasyen nya, Kapten Mohana Chandran midang ditimbak munsuh komunis alai iya (Abang Bolhi) bakal ba dada sereta lengan kelimpah ti ngenatka pemedis dalam timpuh 3 hari 2 malam ke diri-diri ba dalam kampung.
“Ba hari ti kedua udah kami ke betimbak, diak alai jari kiba aku endang agi enda ngetu pedis sereta enda ulih megai utai.
“Dada kiba aku ti kena timbak agi meruan tengut-tengut pedis lalu udah mayuh bedarah. Lalat mayuh nutu abi timbak tang aku nadai daya deka muru ti ngujungka lalat nyau betelu ba abi timbak,” ku Abang Bolhi lebuh ngenang pekara ke nyadi 50 taun ke udah.
Malam sebedau sida ti nurun, Abang Bolhi bisi deka nyait tanchut dikena nginau tang enda memukai tiga iti jarum ti dikena iya bela patah magang. Dalam ati iya sigi bisi ngaru mimit laban enda nemu nama reti deka dipadahka 3 iti jarum ti patah nya.
Udah badu merarau hari siti, sida betubuh lima ti betuaika Kapten Mohana sereta Abang Bolhi, Renjer Bajau, Renjer Ali enggau Koperal Rahman ngejang nginau bala munsuh di Hutan Simpan Ulu Kinta.
Dulu agi ari nya sida endang bisi dipadahka Orang Asli enggau ‘Surrendered Enemy Personnel’ (SEP) ba menua nya sigi agi siga laban sida kala betemu enggau bala komunis.
Lebuh ti nurun siti munggu diak alai Abang Bolhi lalu dulu bejalai nuju anak sungai laban deka ngisi butul ai iya enggaika ikak lebuh bejalai. Ba maya nya, iya lalu digelih Mohana ti lalu madahka diri bisi meda munsuh.
Mohana lalu ngasuh Abang Bolhi niki ngerambing bukit, alai bedau lama udah bejalai iya tepedaka tiga iko munsuh ti benung gawa numbak tanah.
Abang Bolhi gegadai mansang semak, keterubah iya asai ti deka ngena duku tang enda nyadi laban enggaika diri alah laban sida tubuh tiga.
Udah nya bisi ga ati iya deka nikauka bom tang enggaika bom nya enda meletup ngujungka iya lalu mutuska runding nimbak sida tiga.
Iya lalu nimbak munsuh ti gawa nya. Enda lama udah nya, iya ngasaika jari kiba iya bisi penat laban udah kena timbak balas munsuh.
Abang Bolhi mega ngasaika dada kiba iya kebus laban peluru lalu darah nyau engkeching pansut ari abi timbak. Iya rebah lalu bebelat labuh ke baruh nyentuk ngagai pun kayu siti alai iya belalai ngendap enggaika ditimbak munsuh.
Udah nya, tiga iku renjer ke bukai lalu belanda nitihka Kapten Mohana ti nguji ngansak nimbak tunga ngagai tekang bala komunis.
Lebuh sida ti betimbaknya ujan turun naka pemangat, Abang Bolhi lalu enda mindah ari alai iya ti ngenduh ngelindung diri ari munsuh.
Hari nyau malam lalu iya nadai ninga kangau Kapten Mohana sereta renjer bukai napatka iya ti kena timbak.
Irauka sida udah lus mati ditimbak munsuh, Abang Bolhi lalu ngenduh dia semalam malamnya. Iya bedauka deka mindah tauka inggar dulu laban nangika munsuh agi nginau ba menua nya.
Hari siti iya nguji ngerayap nurunka Sungai Chemor nyangka ulih mulaika diri laban lebuh diberi penerang, sida dipadahka enti bisi utai apa nama sida patut ngiga ai sungai nya.
Ari nya sida ulih ngilika ai nyentukka datai ba kem sida.
Abang Bolhi nguji nyidi Sungai Chemor tang ketegal ti udah kelalu lelak, iya enda ulih ngerayap agi lalu ngalika diri.
Lebuh beratika abi timbak ba dada, iya meda udah balat ditutu lalat sereta udah berulat.
Abang Bolhi nadai daya ngendas abi nya laban jari iya agi pedis enda ulih megai udah bekau kena timbak.
Ba seberai sungai, iya tepedaka siti lubang lalu bisi ati deka nuju lubang nya ngambi tau nyadika endur ngenduh maya malam.
Tang enda mukai-mukai iya tepedaka kemayang 7 iko orang mansang ngagai lubang gua tanah nya. Iya lalu ngeraiska senapang lalu enda engkeretik.
Semalam-malamnya iya nadai tentu tinduk laban seruran meratika orang ti dipeda iya ba pun lemai tadi. Semalam malam nya mega iya ngenatka pemedis abi timbak ba jari enggau dada iya sereta ngenatka perut lapar enggau aus.
Lebuh hari nyau terebak tawas diak iya meda kemayang orang tujuh iku nya tadi pansut keluar ari lubang gua lalu bejalai ke bukai.
Ba hari ti ketiga Abang Bolhi ngasaika diri enda ulih bejalai ngilika sungai ti ngujungka iya nguji ngerayap pulaika atas begadai gadai.
Nyau kepuas udah ngirit diri diak iya bisi tedinga ka nyawa orang ti dipelabaka raban tim pengiga.
Sigi betul sangka iya alai Renjer Abang Bolhi lalu nimbal kangau nyebut, “Tolong! Tolong! Tolong!’.
Raban pengiga nya tedingaka sangap nyawa iya lalu mansang ngagai tunga iya. Abang Bolhi lalu dibai pulai ngagai kem ngena bilun engkabang begulai enggau bangkai Kapten Mohana.
Raban tiga iku renjer bukai ti nitihka Mohana maya betachah enggau komunis ngendap ba siti endur lalu lebuh hari udah malam sida bejalai mupuk ari nya ngiga jalai minta tulung.
Retinya, Abang Bolhi endang kediri-diri ba endur nya dalam pengelama dua malam lalu semina ba hari ti ketiga bantu datai.
Abang Bolhi pinchin ngena pangkat Pegawai Waran 2.
Tajapan udah lebih 50 taun nyadi, pengingat Abang Bolhi sigi nadai limpang.
Kebuah pia laban pemedis ti diasaika iya indah enda baka entara idup enggau mati lalu nya meh ngasuh penusahnya dikingatka iya belama.
Iya becherita ngagai raban pemansik ari Fakulti Sains Sosial dan Kemanusiaan Universiti Malaysia Sarawak (Unimas), Prof Madya Dr Neilson Ilan Mersat enggau Dr Regina Garai ti benung mansik lalu ngarang bup sejarah Rejimen Renjer Diraja.
Ku Neilson, cherita Abang Bolhi ti ngelaban ujan ngelaban malam sepengelama 3 hari 2 malam sereta keberuran lepi lapar kediri patut ditemu bala mayuh kelebih pemedis iya ti ngidupka diri udah bekau ditimbak ba jari kiba enggau dada kanan.
“Pemerani Renjer Abang Bolhi tu chukup tinggi sereta bemalinka semangat “Agi Idup Agi Ngelaban.”
“Endang sigi ngena sereta engkeman cherita sida tu patut dipansik lalu dipekunsika enggau bala mayuh kelebih agi bala nembiak rebak baru,” ku Neilson seraya madah tu meh utai ulih sereta ditapi kitai lebuh angkat ngetanka pemaik enggau pengelikun menua.
Ngenang kaul ke sama, Dr Regina madah Abang Bolhi udah mandangka pemerani berambunka nyawa napi munsuh lebuh maya nya tajapan iya kediri, bakal sereta bepechah ari bala bukai.
Abang Bolhi agi ngembuan ati ti tegap ngiga jalai ngidupka diri, siku ari orang ti kering semengat sereta bepegai ba jaku panjung ‘Agi Idup Agi Ngelaban’, ku Dr Regina. — DayakDaily
