KUCHING, Sept 3: Sarawak Energy bedau lama tu tadi bisi ngatur program licha enggau tuju ngiri pemereti sentang isu nembiak betubuh bisi enggau penyalah bekenaka dadah ungkup nembiak sekula primari sereta sekundari di Kapit.
Program sehari nya diatur Opis Pelajar Pelilih Kapit begulai enggau SMK Kapit No 2, lalu digulu bala nembiak ari 10 iti sekula.
Kelimpah SMK Kapit No 2, semilan sekula bukai ke bisi ngambi bagi iya nya SMK Kapit No 1, SMK Selirik, SK Kapit, SK Kampung Baru, SK Methodist, SK Lepong Balleh, SK Sg Kapit, SK Sg Amang enggau SJKC Hock Lam.
Rambau licha, bala nembiak diberi penerang sentang pemar enggau empas ke ditapi enti sida bisi ngaul ba kededua isu rama nya.
Licha matak raban pengelicha ari Ijinsi Anti-Dadah Menua (AADK) pampang Sibu, Bagi Tasat Jenayah enggau Narkotik Opis Polis Pelilih Kapit, Opis Pengintu Pengelantang Pendiau Pampang Kapit sereta pengelicha ari Spital Kapit.
Nitihka penerang ari Manager Besai Bagi Tanggungpengawa Korporat (CSR) Sarawak Energy, Jiwari Abdullah, program diatur ari pinta raban komuniti ti keran deka mutarka penanggul rama nya.
“Nengah program tu, kitai ngarap ulih ngiri pemereti sentang pemar ke ditapi enti sida nembiak ngaul diri ba kededua isu rama tu. Kitai ngarap ulih ngurangka penyampau kes tu di Pelilih Kapit,” ku Jiwari.
Tambah iya, Sarawak Energy seruran deka nyukung pengawa ke bisi diatur ijinsi ke bekait ngambi sama bela besaup mutarka isu.
Siku penyereta program, Hendry Thomas ari SMK Kapit No 2 madah program meri mayuh penerang enggau pemereti ba kededua isu ti dipejurai.
Rambau program mega, Pemancha Steward Sawing, bala apai indai enggau pengajar bela bejuraika tanggungpengawa diri ba atur mutarka isu rama nya.
Bela datai Jantai Maseng (Manager Unit Kaul Komuniti Baleh), Azman Hailee (Kepala Pengajar SMK Kapit No 2), Malang Biat (Chairman PIBG SMK Kapit No 2), Tagong Jeffery Agang (Pengari Opis Pelajar Kapit) enggau bala apai indai nembiak. — DayakDaily.
