KAPIT, Dis 8: Sapit Menteri Pemansang Menua Pesisir enggau Kandang Menua, Datuk Alexander Nanta Linggi ngarapka perintah negeri bejuraika ubah Ordinan Tanah Sarawak ke bekaul enggau Pulau Galau sereta Pemakai Menoa ba Aum Kunsil Negeri (DUN) dudi tu ila.
Iya madahka diri gaga endar ati nyema ordinan tanah diubah ngambika orang ti nyadi penuntut ke sah bulih utai ke patut diempu sida.
“Saya ke nyadi orang Dayak sereta bansa Iban nemu pasal Pulau Galau enggau Pemakai Menoa. Taja pia Kort Federal ngaga pemutus lalu aku pechaya Kort ngaga pemutus bepelasarka utai ti dipejurai sebedau tu.
“Ke temu aku, Pulau Galau enggau Pemakai Menoa ke bendar iya patut diempu kitai Dayak. Tu tradisi kitai ti di diterus sereta dikemeran nyentuk ke sehari tu,” ku iya.
Ku Nanta, nyadi pengari perintah iya pechaya perintah pattu nemu peneka rayat kelebih agi ti begunaka nya ke diau mendam di rumah panjai ti enda diperundingka hak tanah sida tang diberi ngagai orang bukai.
“Sida semina dekaka tanah ke nyadi hak sida.Ukai nyadi pengerugi ba perintah laban nya sigi hak sida,” ku iya. — DayakDaily
