KUCHING, Julai 11: Menteri Muda Pemansang Tanah Adat, Datuk Roland Sagah Wee Inn sehari tu tadi madahka, nadai ungkup khas disediaka perintah dikena mutarka penusah rusak reta tengkira ketegal penusah ngenyit.
Taja pia ku iya, perintah negeri semampai siru enggau pengelantang pengidup rayat.
“Ambika chunto, kita sedia bemacham bansa bantuan enggau perengkaguna ngagai orang ke tasah ketegal penusah ngenyit nengah Skim Bantu Penusah Ngenyit (SBB) Opis Pengelantang Pendiau Sarawak (JKMS).
“Lalu nya dipelanja magang perintah negeri.
Ari baruh skim nya ku iya, bantubaka belanja ninting hari, gari, pemakai, barang dapur, kereban sekula, rengka dikena berumah enggau batu ngemanah dagang mit mega bisi bahan disediaka.
Ungkup pelilih Julau ambika banding, naka 30 Jun 2018, RM69, 277.68 udah dibelanja ari sukut pemakai ngagai 332 ruang bilik, ke mungkur 1,320 iku ke tasah ampuh bahdi Julau ari baruh SBB JKMS, ku iya lebuh ke nyaut tanya Adun Meluan, Rolland Duat Jubin ba Aum DUN Sarawak sehari tu tadi.
Perintah negeri ku iya, bela nyendiaka perengka enggau utai ke dikena ninting hari ba palan ngenduh ngambi pulaika oengelantang orang ke tasah nya.
“Kelimpah ari nya, tetiap iku ketuai ruang bilik ke tasah ketegal ampuh bah mega deka diberi Bantuan Duit Pengasih sepenyampau RM500,” ku iya. — DayakDaily
