MP Lubok Antu ningkilka diri ari PKR, madahka sukung ngagai PN enggau GPS

Jugah Muyang

KUCHING, JUN 6: Mandal Presiden Parti Keadilan Rakyat (PKR) Jugah Muyang ningkilka diri ari parti lalu madahka nyukung Perikatan Nasional(PN) sereta Gabungan Parti Sarawak(GPS).

Nengah surat penerang kemari, Jugah ke mega MP Lubok Antu ngalih ketegal penyarut ke nyadi dalam Pakatan Harapan(PH) alai Menteri Besai maya nya ngelengka penuduk ti ngujungka PH dialahka.

“Aku berasai enda lantang ketegal penyarut ke nyadi entara parti dalam Perintah PH.

“Berindik enggau nya, aku udah berandau enggau bala penyukung aku alai sida setuju aku nyukung Perintah PN ungkup pemaik enggau pemansang menua Lubok Antu,” ku iya.

Jugah besemaya deka nyukung Perintah PN ti betuaika Menteri Besai Tan
Sri Muhyiddin Yassin enggau Perintah Sarawak betuaika Datuk Patinggi Abang Johari Tun Openg.

“Enggau nya, aku ngaga pemutus pansut ari PKR lalu mengkang nyadi kaban parlimen ngatika diri ke nyukung Perintah PN sereta Perintah GPS di Negeri Sarawak,” ku Jugah.

Tambah Jugah, iya teulihka mandat rayat Lubok Antu nengah tikit chalun ngatika diri ba Pengawa Bepilih Besai Ke-14 (PRU14).

Pengudah menang ba PRU14 ku Jugah nambah, iya sereta bala penyukung nyereta PKR, siti parti ke ba dalam gempung Perintah PH maya nya.

“Kandang parlimen aku sebengkah kandang endur menua pesisir lalu begunaka bantu sereta sukung ari perintah ba pekara pemansang,” ku Jugah seraya madah iya miakka PH ketegal deka ngemansangka menua.

Ngenang kaul ke sama, Presiden PKR Sarawak Larry Sng berasai kesal enggau pemutus ke digaga Jugah tang ngarapka iya teulihka pemujur.

Ku Larry, enti Jugah ulih nganti lama mimit engka iya (Larry) ulih mutarka pemar ke ditapi alai Jugah irauka nadai mayuh projek diberi PH ba Lubok Antu.

Larry ke mega MP Pakan madah Jugah keran deka mai projek pemansang ngagai Lubok Antu tang semaya iya enda ulih dikemujur ketegal Perintah PH udah dialahka ba bulan Februari ke udah.

Pengudah Jugah ngalih, PKR Sarawak diatu diarika 2 MP aja iya nya Larry enggau MP Miri Micheal Teo.

Dulu agi ari tu, MP Selangau Baru Bian enggau ADUN Batu Lintang mega udah mansutka diri ari PKR lalu nyereta Parti Sarawak Bersatu(PSB).

DayakDaily.