PUTRAJAYA, Jun 20: Majak mayuh Ketuai Pegawai Eksekutif (CEO) Kompeni Bekaul Perintah (GLC) ke dichiri ketegal politik Barisan Nasional (BN) deka ditingkilka pengudah perintah berubah ketegal pengawa bepilih besai Mei 9 tu tadi.
Perintah Pakatan Harapan (PH) enggai ngemaru kontrak CEO Malaysia Airports Holdings Berhad (MAHB) Mohd Badlisham Ghazali ke abis ujung bulan tu enggau CEO Malaysian Resources Corporation Berhad Mohamad Salim Fateh Din ke deka pinchin ujung Jun tu, pia ku pemadah.
Diberita penganti sida deka dipadahka dalam timpuh dua minggu agi. Badlisham ke nyadi CEO MAHB dalam bulan Jun 2014 ke sebedau tu enggau Malaysian Digital Economy Corporation (MDEC), Salim budi syer besai ba MRCB nengah kompeni iya, Gapurna. Majoriti syer MRCB nya suit turu pinchin mensia mayuh dalah, Kumpulan Wang Simpanan Pekerja (KWSP).
“Salim udah madah deka nyurutka diri ari kaunsil direktor ba bulan Januari tu ke nyikap pelin transformasi MRCB nyengkaum nusun baru utang,” ku pemadah.
Pemadah nya mega nyebut beberapa iku agi CEO Kompeni Beranakkka Puku ke Bekaul Enggau Perintah (GLIC) enggau bank dijangka deka diketuka servis nyerumba September, beberapa iku pegawai tinggi perintah mega deka diganti ba awak ke semak.
“Ungkup chiri politik, semina nganti maya aja, kelebih agi ti depa semak tauka bekimpinka perintah BN maya pengawa bepilih besai 2018,” ku pemadah nya.
“Bekaul profesionalisme enggau penaluk. Putrajaya dekaka sidanke nemu nemu gawa, ukai sida ke dipeda semina sebagi ari perintah lama,” sindir iya ke.ngenang siti video musik ti mandangka 53 iku CEO GLC nyadaka lagu “Hebatkan Negaraku” dalam kimpin pengawa bepilih besai BN sebedau tu.
“Bisi orang meda nya baka malas dendam tang ke bendar PH dekaka orang ke nemu gawa nyadi CEO- iya nya ngiring kompeni lalu mai penguntung ngagai perintah.
Taja pan udah mayuh CEO nya betemu sereta nerangka pengawa sida ngagai Kaunsil Penyanding Penemu Perintah ti bechairmanka ex-Wang, Daim Zainuddin bwrengkah ari perintah baru PH ditumbuh Mei 10 tu tadi, tang diberita sebagi ari CEO GLIC deka ditingkilka ambis laun maya Hari Malaysia September 16 tu ila.
Pemadah nya mega nyebut beberapa iku ti mangku pangkat tinggi ba perintah udah betemu enggau kaban Kaunsil lalu benung nganti nasit diri ti deka diputuska pengudah kemisi panjai Hari Raya.
Bisi sekeda nya mega dipelaba deka didawa ketegal ngereja penyalah ba perintah ke sebedautu,” ku pemadah nya baru.
“Kitai meseti ngemanah institusi tu lalu ngiga ke pemadu manah ke ulih gawa, ukai sida bisi dia ketegal bisi kaul politik,” ku pemadah nya. — DayakDaily
