LIMBANG, Nov 3: Sapit Kepala Menteri Datuk Amar Awang Tengah Ali Hasan madah pengawa mayar pampas tanah mandangka perintah enda ngambi tanah baka ke dituduh sekeda orang.
Ku iya, perintah mayar pampas nitihka pematut ngagai pengempu tanah enti tanah tanah sida nya diambi tauka dikena setipak enggau perkara 13 Federal konstitusyen.
Iya mega madahka tanah ke diambi perintah nya endang nitihka perambu endur ngemujurka pemansang nyengkaum ke pengelantang rayat.
Awang Tengah madah, isu ngambi pulai tanah ke nadai notis sereta enda mayar pampas nadai nyadi laban tuju perintah sigi deka ngaga pemansang ke pengelantang rayat.
Pemansang ti dipejalaika ulih ngerembaika ekonomi enggau industri dagang temuai ke deka ngangkatka pemansang.
“Rayat patut meretika juluk perintah lalu meri kerejasama sereta nyukung pengawa nya ke paik pengidup jemah ila,” ku iya. — DayakDaily
