KUCHING, Okt 31: Tan Sri Dr James Jemut Masing madah, pengawa ngaga jalai alun sepenyauh 120 kilometer ari Sibu-Kapit ti lalu nyambung ke Ng Ngunggun enggau Temalat di Song sepenyauh 9.5 kilometer deka dipajakka.
Ku Masing, jalan alun nya mega deka digaga terus besambung ngagai Tekad Hidroelektrik (HEP) Baleh ke dipelabaka tembu digaga ba taun 2020.
Nengah agih Bajet 2018 sepenyampau RM120 juta, jalan alun nya ulih nyambung lalu meri akses ke manah agi ngagai kandang menua pesisir.
Enti jalai nya udah tembu ila, nya ulih mantu peranak menua pesisir menua pesisir bulih penatai pemisi ke tegap nengah chara ngemansangka tanah enggau utai tanam baka madang sawit.
Menteri Besai Datuk Seri Najib Razak lebuh bejuraika Bajet 2018 udah ngungkupka RM934 juta ke projek jalai menua pesisir di Sabah enggau Sarawak.
Masing ke mega Menteri Pemansang Infrastruktur enggau Perengka Pengangkut madah, Sarawak mrambu mayuh agi perengka guna nyengkaum jalai tebing pantai enggau highway kedua.
Pengawa ngaga nya nyengkaum ngaga jematan ngena ungkud urung RM5 bilion. — DayakDaily
