“This article is a translation of Masing refutes assemblyman’s claims about Coastal Road, Second Trunk Road projects originally published on August 21, 2018.”
KUCHING, Ogos 24: Perambu enggau batang kebuah perambu ngaga projek Jalai Tebing Pantai enggau Jalai Besai kedua patut dipeda ari semua sukut ti meri pemaik ngagai rayat, pia ku Sapit Kepala Menteri Tan Sri Dr James Masing.
Ba penerang eksklusif diberi ngagai DayakDaily, Masing nyakal sekeda pengirau ati ti dibantaika Kaban Kunsil Negeri Batu Lintang, See Chee How, ba penerang berita empai lama udah.
See empai lama udah dituduh mangku pengawa nyadi pemesai khas gagai Opis Menteri Kereja Raya.
Masing ke mega Menteri Pemansang Infrastruktur enggau Perengka Pengangkut, madahka sebagi ari projek Jalai Tebing Pantai ke bendar ngangkat manah Jalai Tebing Pantai enggau infrastruktur negeri sereta sambung jalai dikena nangkup pemansang ti diasaika nyadi di negeri tu.
“Aku gaga ati meda YB See ngemaluka diri empu laban projek Jalai Tebing Pantai nya udah dikemendarka 32 taun ke udah kenyau ari taun 1986 lalu mengkang dipejalai nyentuk ke diatu.
“Aku deka nyemetak madah ditu ke alai sebagi ari projek Jalai Tebing Pantai ke bendar diperambu dalam taun 1986, ke bendar udah tembu digaga dalam kandang taun 1980an nyentuk 1990an. Jalai nya diangkat manah diatu laban negeri Sarawak majak mansang dalam kandang beberapa taun ke udah.
“Laluh kereja nembuka tampung bungkur Jalai Tebing Pantai nengah pengawa ngaga jematan dikena nyilih serbis feri,” ku Masing.
Ia madah, bepelasarka pun perambu negeri, semua sambung Jalai Tebing Pantai (sambung jematan enggau ngangkat manah jalai) patur ditembu dalam timpuh lima taun. Tang bepelasarka polisi enggau surat tesau rasmi perintah besai, pemansang infrastruktur ukai agi pekara dikemerat lalu pemansang menua pesisir mega dianggap enda kritikal.
Jematan ba kandang Jalai Tebing Pantai nya patut digaga meraka Batang Rambungan, Batang Igan, Batang Kemena enggau Batang Lupar. Laban YB See ke nyadi bos ba perintah besai nadai ati deka empat iti jematan nya (rengka infrastruktur baru), Perintah Sarawak nadai pilih bukai kelimpah ari ngena duit kediri empu dikena ngaga jematan nya.
Ku iya, See patut malu laban perintah Pakatan Harapan ngendaka hak pemansang Sarawak, lalu pinta belanja ke pemansang infrastruktur enggau pengandal ketuai Parti PKR Sarawak patut nyadika kes tu meseti minta belanja ari perintah besai.
“Enti aku baka YB See, aku deka berasai malu enti nya polisi perintah ti diarika aku, lalu aku sebagi ari nya. Aku bisi ninga YB See bisi pemerat deka ngaga jematan nya. Nya kebuah aku berani madahka iya enggau bos iya udah minta belanja ba renggat perintah besai. Perintah Sarawak tentu enda malu nerima belanja asal ke bendar ti patut diungkupka ngagai Sarawak.”
Nimbal See bekaul enggau penyauh Jalai Besai kedua ti deka ngemanjaika timpuh pejalai, ku Masing, penemu nya enda logik.
“Semua penyampau pemanjai jalai tebing pantai ke diatu ti deka diangkat manah ari Kota Samarahan ke Sibu iya nya 235km. Sentang langgur penemu YB See ke deka deriba ari Kota Samarahan nengah jalai tebing pantai lalu rembus ba Debak, lalu udah nya nengah Jalai Besai Pan Borneo ke utara, penyauh nya urung 291km, agi begunaka timpuh deriba ke panjai dibanding enggau nengah Jalai Besai kedua.
“Ke referen, ngagai Betong enggau Sri Aman jalai nya agi ari baruh Jalai Besai kedua, agi dalam kandang nuju ke menua pesisir. Meri tuju ke bebida sereta batang tuju jalai tu ke bendar iya ngempung jalai besai di peisisir ngambika ulih ditengah ngagai kandang menua dipesisir ari Ulu Sg Layar, Pakan, Julau, Kanowit, Song, Kapit enggau Baleh.
“Akses ngagai garis entara menua engga Kalimantan mega ngemudahka kitai nyaga garis entara menua kitai enggai Indonesia,” ku Masing.
Ia mega madahka iya bejaku pasal ngelimat jam bejalai maya Aum Kunsil Negeri (DUN) maya bulan November taun siti nyin tadi, ukai aum DUN dalam bulan Julai tu tadi baka ke dipadahka See, lalu utai ti dipadahka Masing iya nya ari Kuching ke Sibu, ukai ari Kota Samarahan ke Sibu ke nengah Jalai Besai Pan Borneo ke sepenyauh 400km.
Masing mega madah, See anang enda ibuhka peneka enggau utai ti diguna peranak Sarawak ti diau di menua pesisir lalu pemesai reti pemansang infrastruktur enggau penyambung dikena ngangkatka standard pengidup sida.
“Aku nemu iya orang ti diau di mengeri, tang YB See meseti meretika pemisi bekal ai beresi ke manah, utiliti enggau pemansang infrastruktur baka jalai ke ulih ditengah, pemisi pekereja teknikal ke diguna ungkup pemansang enggau ke suah enda chukup sereta aksesbiliti ke nyadi kunchi semua pekara,” ku Masing. — DayakDaily
