Masing enggau Uggah enda lantang ungkup Sarawak ba Bajet 2019

Tan Sri James Jemut Masing

KUCHING, 2 Nov: Agih belanja RM4 biliun ungkup Sarawak ba Bajet 2019 enda adil, ku Sapit Kepala Menteri Tan Sri Dr James Masing.

Menteri Pemansang Infrastruktur enggau Perengka Pengangkut nya ngasai Sarawak patut diberi lebih agi ari RM4 biliun.

“Ukai penyampau ke diberi ti diperatika aku. Pekara ti dikedeka aku iya nya sekalika penyampau RM4 biliun nya adil tauka enda.

“Anang enda ingat, Perintah Besai teulihka untung ke besai ari minyak enggau gis kitai Sarawak,” ku iya meri penemu sentang Bajet 2019 ke dibantai Menteri Pekara Wang Lim Guan Eng di parlimen seharitu.

Ba bajet nya, Lim netapka Sarawak diberi agih belanja RM4,346 juta enti dibandingka RM4,336 juta ba taun 2018.

Beambika chunto ba taun 2017, Masing madah Petronas mansutka 850,000 tung minyak ari kandang tasik Sarawak ninting hari.

“Sekalika agih belanja RM4 biliun nya adil ungkup Sarawak? Ingatka semaya manifesto Pakatan Harapan maya Pengawa Bepilih Besai Ke-14.

“Semaya Pakatan netapka Sarawak diberi penatai pemisi ke besai ari asil chukai ba aset Sarawak. Kitai patut diberi agih belanja ke besai agi,” ku iya ke mega Presiden Parti Rakyat Sarawak.

Ngenang kaul ke sama, Kaban Kunsil Negeri (ADUN) Baleh nya mega deka nemu sekalika Bajet 2019 bisi mungkur pengawa nyukat kelingi tanah NCR.

Ku iya, Menteri Besai jeman Perintah Barisan Nasional Datuk Seri Najib Tun Razak ngagihka RM30 juta ungkup pengawa nya ninting taun.

Masing mega nanya sekalika bisi agih belanja dikena ngemanah sekula repuk di Sarawak dalam bajet nya.

Pekara Sempekat Malaysia 1963 (MA63) enggau ulah Petronas ngelumbung minyak kitai chara enda sah bela enda disebut, tandu Masing.

“Lim mimit pan enda nyebut sentang pekara tu ke berat ungkup Sarawak,” ku Masing.

Datuk Amar Douglas Uggah Embas

Sepenemu enggau Masing, Sapit Kepala Menteri Datuk Amar Douglas Uggah Embas netapka bajet keterubah Perintah Pakatan nya nadai mai pemaik ngagai Sarawak.

Ku iya ke mega Menteri Betanam Betupi Moden, Tanah Adat enggau Pemansang Kandang Menua, nadai program bisi disedia ungkup orang bekebun betupi di negeri tu.

“Kitai enda nemu alai iya (Lim) enda madahka sebarang sabsidi ungkup pengawa bekebun getah, lada, sawit enggau utai tanam bukai. Aku enda nemu kebuah, bajet nya enda diterang enggau silik,” ku iya seraya madah deka macha enggau silik Bajet 2019.

Uggah madah agih belanja RM50 juta dalam bajet nya ungkup pengawa bekebun getah di serata menua enda chukup.

Kala suba ku iya, perintah meri bantu RM500 (sekali beri) ngagai orang bekebun mit alai nya begunaka belanja RM30 juta ungkup 7,500 iku orang bekebun mit di Sarawak.

“Orang Asli bisi, Cina bisi, India bisi… orang asal Sabah enggau Sarawak baka ke nadai,” ku iya. — DayakDaily