KAPIT, Nov 21: Majlis Amanah Rakyat (MARA) majak mantu komuniti menua pesisir nengah program Tanggungpengawa Rama Korporat (CSR) iya nya ‘Program Hati Emas MARA’.
Berambaika leka jaku Melayu ke digempung enggau jaku Iban ‘Belia Berkemahiran Pemangkin, Ngemangsangka Menua’, program nya udah dikemujurka ba Rumah Empawi di Nanga Sekukut, Sungai Yong, Kapit kena Nov 15 tu tadi.
Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi, udah dipebasa nutup program nya ke bela digulu Pengarah MARA Sarawak Dr Azmi Amat Munjan.
Lebuh ke bejaku, Nanta madahka Program Hati Emas nya dikena nentuka peranak menua pesisir bela ngasaika teknologi nengah asil pemansang projek inovasi ti dipejalaika Institut Kemahiran MARA (IKM) iya nya Pemansang Sistem Betanam Betupi Di Pasar.
Teknologi nya dibai kia nengah 43 iku nembiak enggau lecturer IKM Bintulu ke nyengkaum nguna unit rumah gadung, sistem akuaponik enggau fertigasi, sistem ngetau asil enggau nyelapka ai sereta sistem solar.
“Nya dikena ngerapitka seraka ari sukut infrastruktur, ekonomi, pelajar enggau ke bukai ti mega pemansang ke mungkur semua ti nyaup ngelantangka rayat,” ku Nanta.
Pengarah program nya, Michael Jangi madahka diri puas ati medah sukung ari peranak rumah panjai nya sereta ngarapka projek inovasi nya meri pemaik kelimpah ngangkat penatai pemisi sida seraya nyadi chunto ngagai peranak rumah panjai bukai ke ngelingi Kapit. — DayakDaily
