Lumba ‘Ulu Paku Mountain Bike’ Ke-2 mujur diatur

Uggah (bediri empat ari kanan) begambar bebala mayuh enggau bala pemenang.

KUCHING, Okt 6: Lumba ‘Ulu Paku Mountain Bike’ Ke-2 taun 2019 ke diatur tiga hari berunggu berengkah Hari Empat tu tadi mujur matak mayuh penyereta.

Rumah panjai Francis Nyanggau di Penom ke nyadi palan endur ngatur pekit richah dikerami bala penyereta nyengkaum bala temuai bukai.

Sapit Kepala Menteri Datuk Amar Douglas Uggah ke mega peranak Rh Francis madah pekit nya mantu nambah penatai pemisi peranak rumah panjai kelimpah meri peneleba baru ngagai sida sekayu rumah.

“Ke pemadu manah iya nya sida bisi nyendia program nyemilik ungkup bala temuai.

“Kelimpah ari nya, sida mega bisi muka bansal bejual pemakai enggau produk asil ari pengelandik jari,” ku iya rambau nutup program nya malam tadi.

Uggah ke mega Menteri Betanam Betupi Moden, Tanah Adat enggau Pemansang Kandang Menua nambah program mega bisi nyelitka pengawa bukai baka ke mandang main asal Iban ngajat, betaboh enggau begendang.

Ku iya, mayuh agi program bukai deka diatur ba taun baru kelebih agi mandangka pengawa betanam betupi.

“Kitai deka mandangka chara betanam betupi moden, sentang pengelebih sereta pemaik ngagai rayat,” ku iya.

Dua ari kanan: Uggah sereta bini, Doreen bekunsi pengaga enggau pemenang chabut tikit benasit ke nerima perais mutusikal.

Lumba ‘Ulu Paku Mountain Bike’ 2019 mujur matak lebih 90 iku pelumba basikal alai ba kategori ‘Lelaki’ gelar champion pulai ngagai Muaz Abd Rahman.

Ungkup kategori ‘Lelaki Veteran’ gelar champion pulai ngagai Mohd Zukri Tahir.

Kededua Muaz enggau Mohd datai ari Kuala Lumpur.

Gelar champion ba kategori ‘Junior’ pulai ngagai Eason Chong Kai Ceng alai Tay Choon Lian menang ba kategori ‘Sarawak Closed’.

Kategori “Betong Closed’ gelar champion pulai ngagai Andrew Bilong ari Spaoh.

Bela datai bini Uggah, Datin Amar Doreen Mayang enggau Residen Betong, Friday Belik.

Ungkup serak ketiga, program deka diatur ba bulan Julai tauka Ogos 2020. — DayakDaily