LouisWesly Enterprise meransang mensia mayuh nyereta woksyop ngaga Sugu Tiggi & Kain Buriek kena Okt 27 tu

Woksyop ngaga sugu tinggi enggau kain buriek
IBRACO WEBSITEI

KUCHING, Sept 17: LouisWesly Enterprise sebuah kompeni ti ngemansangka asil pengelandik jari Malaysia Pampang Kuching Sarawak deka ngatur woksyop ngaga Sugu Tinggi enggau Kain Buriek kena Oktober 27.

Woksyop sehari nya deka diatur ba LouisWesly Enterprise Batu 7 Kuching.

Kamsiah siku pengajar ngaga asil pengelandik jari nya lebuh diinterviu pengarang berita ari DayakDaily madah, tuju worksyop nya diatur endang kena bekunsi penemu enggau bala mayuh, ngambika penemu ngaga asil pengelandik jari tu enda punas sengapa sereta bisi ditampung nembiak rebak dudi.

“Tuju woksyop tu diatur endang kena bekunsi penemu ngambika enda punas seraya ngetanka asil pengelandik jari bansa asal kitai.

“Kelimpah ari nya mega tau nambahka penatai pemisi ngagai orang ke udah landik ngaga asil pengelandik jari nya,” ku iya ke siku indai tunggal ti beasal ari Rumah Jamban Bukit Engkelong Sg Genaan Pandan, Sebauh Bintulu.

Kain buriek
Sugu tinggi

Ku Kamsiah, sebedau ngemeran batang pengawa ngaga asil pengelansik jari tu, suba iya gawa ba kompeni dikena melanja ruang bilik iya.

Ketegal penanggul belanja enggau jam ngatur anak besekula, iya lalu ngenyinakka diri ba pengawa ngagai asil pengelandik jari tu. Diatu ku iya, asil ari nya, iya lantang ati enggau belanja ari pengawa ngaga asil pengelandik jari tu.

Ku iya, worksyop ngaga sugu tinggi udah lama diatur ke ukai semina diatur di Kuching aja tang mega ba endur bukai baka di Sarikei, Sibu, Bintulu, Miri nyentuk ke Brunei.

Di Kuching, woksyop tu udah suah diatur baka di Batu 7, Batu 12 enggau ba Dewan DBNA, taja pia ku iya, woksyop ngaga kain buriek nya baru dua taun udah diatur LouisWesly Enterprise.

Taja pan diatur di Kuching, tang pesereta ke datai enggau woksyop nya bisi mega ari pelilih menua bukai.

Kamsiah madah, tembu worksyop nya ila, pesereta ke udah landik ngaga asil pengelandik jari nya tau ngaga lalu nyual asil sida ngagai orang ke dikelala, lalu LouisWesly Enterprise mega bisi nyaup sida ngelaluka asil nya nengah laman sosial baka facebook.

Baka Kamsiah empu, kelimpah dijual di dalam nengeri tu, asil pengelandik jari ke digaga iya dijual nyentuk ke Semenanjung Malaysia.

Ku iya, sugi tinggi siti dijual enggau rega berengkah ari RM200 ke atas, bepanggai ba bansa utai ke dikena ngaga, lalu kain buriek siti dijual berengkah ari RM500 ke atas.

Marik asil jari Kamsiah.

Nengah awak tu ila meransang mensia mayuh nyereta woksyop tu ngambika ulih nambahka pengelandik, ngetanka asil pengelandik jari bansa kelimpah ulih ngenataika pemisi ngagai sida.

Sesapa ke bisi ati nyereta woksyop tu tau ngerejister diri ba Louis nengah lumur 0192344562/ 019 4868476 enggau Kamsiah ba lumur 0178449600.

Tetiap pesereta dipinta mayar yuran nyereta RM 200 sereta deposit 100 ungkup kain buriek lalu RM150 enggau deposit RM50 ungkup sugu tinggi lebat.

Ungkup woksyop kain buriek nya ditatak ngagai 15 iku aja, lalu sunggu tinggi ditatak ngagai 20 iku aja.

Perengka enggau makai ngirup pesereta ditanggung LouisWesly Enterprise lalu tetiap iku pesereta ke udah ngulu woksyop nya deka diberi setipikit.

Woksyop deka berengkah pukul 8 pagi nyentuk 5 lemai. — DayakDaily