Licha DAP di Sibu nerima sambut ke manah

Democratic Action Party logo (source: https://dapmalaysia.org/en/archive/rocket-symbol/)

SIBU, Mei 1: Urung 1,500 iku dtai ngulu licha DAP malam ensana.

Licha ke digulu Sekretari Besai DAP Lim Guan Eng nya diatur ba Chew Siik Hiong, semak enggau Palan Perubat Rejang ke berengkah pukul 7 malam sereta tembu pukul 11 malam.

Penatai Lim ke Sibu ketegal mantu penyandang Parlimen Lanang enggau Sibu iya nya Alice Lau sereta Oscar Ling ngenanka sitak nya ari diambi Barisan Nasional.

Lim ke mega Kepala Menteri Pulau Pinang meri licha pasal “Polisi Oengelantang Pendiau Pakatan Harapan Ke Pemadu Manah Ungkup Rayat”.

Polisi nya udah dipasuk dalam manifesto Pakatan Harapan kelebih agi ungkup Sabah enggau Sarawak ti ngembuan manifesto kediri baka ti dibantaika chairman Pakatan Harapan, Tun Dr Mahathir maya meri licha di Kuching empai lama udah.


Kelimah ari nya, Lim mega bisi ngelansa pasal manifesto Pakatan Harapan serreta pengelemi perintah ke diatur maya ngaduka pengawa ngiring menua.

Pengudah mantu chalun DAP di Sarawak, Lim lanjur ke Sabah mantu chalun DAP di Sabah.

Ba Pengawa Bepilih Besai sekali tu, Alice deka disatup Kelvin Kong ari Barisan Nasional enggau Priscilla Lau ari Sarawak Peace Party.

Oscar disatup tiga iku chalun iya nya Datuk Andrew Wong ari Barisan Nasional, Jamie Tiew ari Sarawak Peace Party enggau Simon Tiong ari Parti STAR. — DayakDaily

Share this article!