Kuching deka bisi sebuah LCCT — Abang Jo

Chief Minister Datuk Patinggi Abang Johari Tun Openg

KUCHING, Feb 27: Kepala Menteri Sarawak kemari ngamatka sebuah padang bilun tambah murah (LCCT) deka digaga di Kuching nengah kerejasama enggau kompeni AirAsia Berhad.

Enggai madahka dulu palan padang bilun nya deka digaga, Datuk Patinggi Abang Johari Tun Openg madahka perintah enggau AirAsia diatu enung berandauka pekara nya diaru.

“Kami benung beratika pemaik langgur penemu tu ngagai negeri kitai reti nya kitai deka bekerjasama enggau orang ke bekaul ” ku iya ba aum media pengudah bejadika Sarawak Dialogue 2018 di Hotel Riverside Majestic ditu.

Sama bisi datai Menteri Dagang Temuai, Art, Main Asal, Nembiak Lumba enggau Main, Datuk Abdul Karim Rahman Hamzah; Sekretari Perintah Negeri, Tan Sri Mohd Morshidi Ghani enggau Ketuai Pemesai Eksekutif Raban Air Asia Berhad, Tan Sri Tony Fernandes.

Ku Abang Johari, palan padang bilun nya udah dikelala tang empai dibantaika.

“Nya tau ngasuh rega tanah ngenyit tinggi. Pekara nya dipesetuju setipak enggau juluk ati Tony ti dekaka Kuching nyadi hub penerbai murah di rantau tu.

“Kami nerima manah langgur penemu tu laban ba kami, majak mayuh temuai datai majak mayuh mega palan endur makai dibuka, hotel laku lalu industri kotej mega ngerembai,” ku iya. — DayakDaily