BETONG, Dis 7: Komiti Mutarka Penusah Ngenyit diatu udah sedia napi penusah ampuh bah, pia ku Sapit Kepala Menteri Datuk Amar Douglas Uggah Embas, ke mega chairman komiti nya.
“Ba tetiap pelilih menua, komiti bechairmanka D.O pelilih menua nya, udah ditumbuhka. Sida semua udah sedia bejalaika pengawa nyema ampuh bah bisi nyadi.
“Seketeriat Komiti Mutarka Penusah Ngenyit Negeri udah nesau semua bilik operasi pelilih menua sentang penusah ke tau nyadi ketegal ai pasang besai dalam kandang beberapa hari tu,” pia ku iya.
Ampuh tau nyadi ba sebarang endur ket2gal ujan bangat diatu ke disererumba enggau pasang besai.
Uggah ensanus udah ngabas Rumah Dau Temedak Spak di Betong sereta nyuaka bantu pemakai ngagai sida ke dituntung penusah ampuh bah enggau tanah tusur, ke alai semua penyampau sida nya bisi 112 iku ari 56 buah ruang bilik.
Rumah Dau Temedak Spak udah dituntung penusah tanah tusur ketegal hari bangat ujan kena Hari Satu tu tadi.
Nambahka pemeri nya, Uggah ngemendarka RM40,000 dikena ngemanah jalai ketegal ampuh bah enggau tanah tusur di Mupoh Baruh, Betong lalu RM30,000 agi dikena ngemanah jalai ke putus kwtwgal tanah tusur semak Lempaong, Betong. — DayakDaily
