SARIKEI, April 29: Kepala Menteri, Datuk Patinggi Abang Johari Tun Openg sehari tu komited deka ngemansangka Pasar Bintangor nyadi palan pengeluar buah Sarawak.
Ku iya, diatu Bintangor dikelala nyadi palan pengeluar limau, melon enggau sayur, lalu tu patut dikemayuhka agi ngena teknologi.
“Kuala Rajang udah ngemujurka pengawa tu nengah ngeluarka rock melon sechara fertigasi.
“Aku arap endar, Bintangor mega ulih nguna teknologi ke sama,” ku iya lebuh bejadi Program Sejiwa Senada Meradong di Stadium Bola Keranjang Bintangor ditu pagi tadi.
Abang Johari madah, Bintangor diatu udah berubah nyadi baka Sarikei enggau Tanjong Manis.
Bintangor enggau Meradong nyentuk ke taun 1980-an kala dituku nyadi kandang menua ‘chelum’ ketegal dikachau kominis.
Ba pengerami nya, Kepala Menteri madahka seka ngaga jalai alun sepenyauh 17 kilometer ke nyambung pasae nya enggau Tanjong Manis.
Projek ti begunaka ungkus RM450 juta nya dijangka ulih mantu pengawa perintah ngemujurka menua nya enggau Sarikei nyadi pengeluar enggau palan ngumpul asil betanqm betupi.
Abang Johari mega ngungkupka belanja RM81 juta dikena ngangkatmanah bekal ai di Meradong, ke alai RM30 juta dikena ngaga batang paip besai ari palan nimbun ai Bulat ke Temadak, RM25 juta ari Temadak ke Pasar Meradong lalu RM25 juta dikena ngaha stesen pam di Kelupu, Julau, Durin enggau Jalai Strass.
Samam bisi datai chalun Barisan Nasional (BN) Parlimen Tanjong Manis, Yusuf Abd Wahab enggau chalun BN Parlimen Sarikei, Datuk Seri Huang Tiong Sii. — DayakDaily
