KUCHING, Nov 14: Perintah negeri nengah Komiti Kabinet Transformasi Menua Pesisir deka ngangkatmanah Klinik Pengerai Sungai Asap dalam sitak Kunsil Negeri (DUN) Murum, pia ku Menteri Muda Pengawa Berumah enggau Pengerai Mensia Mayuh, Dr Annuar Rapaee.
Ku iya, Klinik Pengerai Sungai Asap deka nyadi klinik referen dalam Sistem Kluster Klinik nyengkaum dalam Program Transformasi Menua Pesisir Ungkup taun 2018.
“Klinik Sungai Asap deka nyadi palan referen Klinik Pengerai Sungai Koyan, Klinik Pengerai Uma Sambop, Klinik Pengerai Sarawak Hidro enggau Klinik Pengerai Tubau.
Iya madah munyi nya lebuh ke nyaut tanya ari Chukpai Ugon (BN-Murum) ba Aum DUN Sarawak kemari.
Bekaul enggau pengawa numbuhka Unit Perubat Haemodialisis ba Klinik Sungai Asap, Rapaee madahka perintah agi berunding merambu unit nya.
“Diatu empai bisi perambu numbuhka Unit Haemodialisis di Klinik Sungai Asap ungkup peranak Skim Pengentap Baru Tekad Ai Bakun, Sungai Asap,” ku iya. — DayakDaily
