Dikarang Chris Bishop
BETONG, 26 Sept: Sapit Kepala Menteri Datuk Amar Douglas Uggah Embas nyangkal tuduh ti madah Kepala Menteri Datuk Patinggi Abang Johari Tun Openg enda kiruhka bansa Dayak.
Bejaku ba Konvensyen Khas Parti Pesaka Bumiputera Bersatu(PBB) Zon Betong 2020, Uggah ngelalau raban orang ti suah mai tuduh ngetuka ulah ke baka nya.
“Bisi tuduh ti madah kepala menteri enda kiruhka bansa Dayak. Tuduhnya enda betul. Uji kita macha sereta meretika program-program ke udah digaga kepala menteri.
“Anang rindu ngasut orang Dayak ketegal chukup meh orang Dayak diasut,” ku iya ba pengerami ke diatur di Dewan Stephen Kalong Ningkan ditu, seharitu.
Konvensyen dipenyadi Abang Johari ke mega Presiden PBB alai pengerami bela digulu raban ketuai renggat tinggi parti.
Tambah Uggah, Abang Johari udah meri bantu ari sukut belanja enggau tanah ngagai Unit Pekara Agama Bukai (UNIFOR), Yayasan Kebudayaan Melayu, Persatuan Kebangsaan Orang Ulu (FORUM).
Kelimpah ari nya ku iya, Yayasan Kebudayaan Dayak enggau Persatuan Kebangsaan Dayak Bidayuh bela nerima bantu ke sama.
“Semua tu digaga ngambi ulih nyaga pengelikun sereta penyerakup semua bansa enggau agama di negeri tu,” ku Uggah ke mega ADUN Bukit Saban.
Nambahka nya ku iya, Abang Johari udah numbuhka kandang endur pemansang ti nyata mandangka iya ngemeran dasar inklusiviti.
Ambi ka chunto, iya udah numbuhka Kandang Pemansang Ulu Rejang (URDA) ti tebal agi diwan bansa Dayak.
“Ijinsi Pemansang Sri Aman (SABA) ti mungkur menua Lingga, Batang Sadong, Batang Lupar sereta Lubok Antu ti diwan pupu bansa.
“Pia mega Kandang Pemansang Tanah Tingggi (HDA) ke diwan bansa Orang Ulu. Kandang Pemansang Tunga Utara (NRDA) ti mungkur menua Lawas, Limbang, Ba’Kelalan enggau Long Semadoh diwan pupu bansa.
‘Di Betong iya numbuhka Bukit Sadok Agroplitan alai ditu tebal agi diwan bansa Dayak,” ku Uggah.
Ngenang kaul ke sama, Uggah ke mega Sapit Presiden PBB madah Abang Johari mega udah mutarka isu ke bekaul enggau tanah NCR.
Ku iya, kepala menteri udah ngubah Kod Tanah Sarawak sereta ngakun konsep Pulau Galau enggau Pemakai Menua.
“Iya (Abang Johari) udah ngagihka RM40 juta ba taun tu dikena ngadu kereja nyukat tanah rayat,” ku Uggah nandu.-DayakDaily.
