BETONG, Dis 11: Kelimpah ari projek ngaga Pan Borneo Borneo Highway (PBH) bungkur jalai alun bukai deka majak digaga sereta diangkat manah ngambi ulih nyediaka siti bungkur jalai alun ti ngemudahka pejalai peranak menua tu ngagai palan ti dituju sereta ngerembaika ekonomi negeri.
Menteri Kereja Raya, Dato’ Sri Fadillah Yusof madah, pengawa ngangkat manah sistem jalai alun di Sarawak seruran dikemerat laban agi mayuh kandang menua di negeri tu bedau disambung nengah jalai darat sereta agi bepanggai ba sungai dikena mindah ngagai palan ke dituju.
“Aku datai kitu meda pemansang kereja ngagai PBH lalu nentuka proses ngaga nya nitihka prosedur operasi standard (SOP) ti ditetap ngambika enda ngenusahka penguna jalai alun.
“Kapit deka disambung enggau jalai alun enti pengawa ngaga jalai alun nya udah tembu ila. Naka ke diatu jalai alun ke kapit udah datai naka Kanowit sereta mengkang dipajakka.
“Jalai tebing pantai mega bela digaga ngambika ulih nyambung pejalai ba kandang tebing pantai. Tu ngemudahka peranak ba kandang menua nya mai pansut asil sida ngambika ulih dijual sereta nyungkak tikas ekonomi sida, ” ku iya.
Fadillah bejaku munyi nya beserimbai enggau ‘Malam Mesra Armada Pemuda PBB Zon 5’ di Betong.
Pengerami ke diatur ba Dewan Lumba Enggau Main Tan Sri Datuk Amar Stephen Kalong Ningkan nya bela digulu beberapa iku ketuai pampang enggau pengari PBB ari serata negeri.
Nengah awak nya mega iya meri terima kasih ngagai saup rebak biak PBB ke udah mayuh mantu mai pemujur ngagai BN ba pengawa bepilih kunsil negeri ke sebedau tu. — DayakDaily
