KUCHING, Sept 22: Karnival Matang Jaya Mall ke diatur berengkah ari 30 Ogos ngagai 29 September 2018, richah digulu mensia mayuh ninting malam.
Mayuh macham main bisi disediaka ungkup mensia mayuh ti datai ngelantangka ati ngagai palan nya.
Karnival nya serak tu bisi nyendiaka palan nyual bemacham bansa pemakai enggau ai irup ngagai mensia mayuh ke datai kia ti dibuka ari pukul 3 lemai nyentuk 12 tengah malam.
Ba karnival ke sekali tu mega, raban pengatur bisi nyendiaka mayuh macham pekit enggau aktiviti sekalika ungkup nembiak mit tauka orang besai tuai.
Entara pekit enggau aktiviti ke bisi diatur baka pekit nyura ungkup nembiak mit enggau bemacham agi.
Kelimpah ari nya, mensia mayuh mega bepeluang beperindang sereta bekelala enggau artis ari menua tu empu baka Melissa Francis, Winnie Albert, Maxwell Franklin Saran, Alon Lupeng, Lucy M, Joyce Menti, Karen Libau, Betty, Connie Francis, Linda, Eisner Nala, Jessica Remaya, Mark Benet, Alexander Peter, Angela Lata Jua, Ernie Diana, Rannee Pat, Leez Zwita, Pamela David, Swaylin, Sima, Eyqa Saiful, Ricky Andrewson, Timothy, Achan Ricky El enggau ke bukai.
Bala artis tu merindang mensia mayuh ke bisi datai kia nengah chara begintir nitihka atur ti udah ditetapka raban pengatur festival.
Kenyau ari karnival tu ke diatur, pengerami nya udah mujur matak penatai beribu iku mensia mayuh enda ngira bansa, penatai enggau jalai pengarap ti sama datai kia beperindang sereta mandangka sukung ngagai festival nya.
Nyata endar dipeda festival tu ulih ngempuru sereta nyerakup rayat menua tu sama begulai berami baka dikedekaka bala ketuai menua, ti deka rayat begulai dalam menua ti likun sereta lantang. — DayakDaily
