Dikarang Chris Bishop
KAPIT, 5 Okt: Kapit diatu udah datai jalai lalu disambung ngagai selampur pelilih di Sarawak, ku Sapit Kepala Menteri Tan Sri James Masing.
Ku Masing, juluk meda Kapit disambungka jalai ngagai Sibu nyadi nyata diatu asil pengeran Kepala Menteri Datuk Patinggi Abang Johari Tun Openg.
“Dulu agi ari tu Perintah Besai nengah Opis Menteri Pemansang Menua Pesisir besemaya deka nyendia belanja dikena ngaga jalai Sibu ke Kapit, tang BN alah bepilih maya nya.
“Nasit iya (Abang Johari) datai lalu nyendia belanja ti ngujungka jalai tu tembu diatu.
“Penyauh Jalai Sibu ke Kapit 110 km sereta begunaka belanja RM158 juta,” ku iya.
Masing mansutka jaku nya ba Makai Lemai begulai enggau komuniti di Dewan Suarah Kapit malam tadi.
Miakka pagi kemari, Masing nyempulang Abang Johari ba Ekspedisyen Bemutusikal Sibu ke Kapit.
Masing ke mega Menteri Pemansang Infrastruktur enggau Pelabuhan nambah, ekspedisyen diadu dikena mandangka ngagai rayat diak Kapit diatu udah bisi jalai.
“Kepala menteri deka madah ngagai rayat diak iya ulih bemutusikal ari Sibu ke Kapit.
“Diatu, nadai orang ulih madah Kapit nadai jalai. Kepala menteri udah datai kitu bemutusikal,” ku Masing ke mega Adun Baleh.
Ngenang sentang pengawa ngaga jalai Sibu ke Kapit dulu suba, Masing madah irauka dini endur ngiga belanja.
Ku iya, Kapit udah lama tinggal ari sukut pemansang enti dibanding enggau pelilih bukai.
“Tang Abang Johari dalam timpuh 3 taun nyadi kepala menteri udah mujur ngulihka belanjanya dikena ngemansangka Kapit.
“Enti iya enda pintar, kitai nadai bulih belanja tu,” ku Masing.
Ba makai lemai nya, Abang Johari bisi nyuaka setipikit chiri tuai rumah ngagai 52 iku orang di Kapit. — DayakDaily
