Jalai Ulu Suai disambung ngagai Jalai Tebing Pantai

Abang Johari nyain bup temuai rambau ngelawa Projek Jalai Ulu Suai di Niah.

Dikarang Chris Bishop

KUCHING, 25 Ogos: Projek Jalai Ulu Suai, Niah di Miri pemanjai 19km ke beungkus RM68 juta deka disambung terus ngagai Jalai Tebing Pantai.

Kepala Menteri Datuk Patinggi Abang Johari Tun Openg madah jalai baru penyauh 300 meter ari Rh Iran di Suai nya begunaka ungkus RM3 juta.

“Projek Jalai Ulu Suai nengah ungkus RM68 juta tu ungkup pengelantang rayat. Tang bedau tembu projek tu, udah bisi minta projek bukai.

“Enda mayuh semina pemanjai 300 meter aja. Ba aku nadai penanggul, sambung aja ari Rh Iran pemanjai 300 meter ngagai Jalai Tebing Pantai.


“Enggau nya, ungkus semua projek tu manggai RM31 juta,” ku Abang Johari rambau ngelawa palan Projek Jalai Ulu Suai di Niah seharitu.

Projek Jalai Ulu Suai digaga nengah teknologi moden ti ulih nyendia jalai ke tegap sereta disadang tembu ba bulan November 2021.

Abang Johari nambah, pekara pemansang di menua pesisir sigi pekara ti dikemerat Perintah Gabungan Parti Sarawak (GPS) alai jalai ke benung digaga deka meri pengelantang ngagai rayat tembu ila.

Berindik enggau nya, Abang Johari ngelalau rayat ke diau ngelingi beambi ulih ari pemansang ke disedia lalu ngaul diri ba pengawa betanam betupi chara moden.

Ku iya, perintah deka nyendia jalai alun, bekal lektrik enggau ai ngambi tau nyaup pengawa betanam betupi chara baru.

“Diatu Singapura deka meli sayur ari kitai. Sida (Singapura) keran deka meli terung dayak kitai.

“Tanah tunga ke utara ditu manah endur betanam,” ku Abang Johari.

Ngenang kaul ke sama, iya mega madah dalam timpuh lima taun ti deka datai Jalai Ulu Suai deka disambung terus ngagai Jalai Besai Pan Borneo.

“Kitai bisi belanja alai jalai tu deka disambung ngagai Jalai Besai Pan Borneo.

“Ulu Suai enda dikumbai ulu agi, menua tu ditengah-tengah Miri enggau Bintulu lalu bisi jalai penyambung ngagai Jalai Tebing Pantai pia mega nuju Jalai Besai Pan Borneo,” ku iya nambah.

Abang Johari nambah, GPS keran deka ngemansang menua pesisir alai semua semaya sigi deka nyadi nyata.

Ba penemuai nya, Abang Johari bisi ngagihka RM900,000 ungkup 9 buah rumah panjai (RM100,000 siti rumah panjai) sereta RM400,000 agi ungkup 4 genturung pendiau ba menua Suai.

Ku iya, bantu nya dikena ngelempung tating belanja peranak rumah panjai pengudah dituntung penusah Covid-19 diatu.

Bela datai Sapit Kepala Menteri Tan Sri James Masing enggau Menteri Utiliti Datuk Seri Dr Stephen Rundi. — DayakDaily