PUTRAJAYA, Julai 11: Opis Menteri Orang Indu enggau Pemansang Ruang Bilik deka beratika randau bekaul perambu ti dekaka ikas umur orang ke tau jadi melaki bini ngagai 18 taun dibanding enggau 16 taun diatu.
Sekretari Politik opis menteri nya Rodziah Ismail madahka tu seriris enggau komitmen perintah bekaul isu tu baka ti udah dipadahka Sapit Menteri Besai Datuk Seri Dr Wan Azizah Wan Ismail ke mega Menteri Orang Indu enggau Pemansang Ruang Bilik kena Julai 2 tu tadi.
Aum dikena berundingka isu nya deka ngaul mayuh opis menteri sereta ejensi kelimpah patut nyemaka ka entara undang-undang Islam enggau sivil, ku iya bejaku lebuh aum media, ditu saritu.
Isu ikas umur minimun orang ke tau kawin udah nyadi siti fokus kominuniti menua tu sepengudah ripot bekaul siku lelaki ari menua tu ke beumur 41 taun jadi enggau nembiak ari menua Thailand ti beumur 11 taun bulan nyin tadi.
Isu tu udah ngerekai ba media rama lalu nerima timbal ari mensia mayuh ti minta ikas umur kawin ditikika.
Nitihka Enakmen Keluarga Islam ke udah dikemendar di semua nengeri, umur minimun bekawin ungkup orang laki iya nya 18 taun lalu ungkup sida ke indu iya nya 16 taun lalu nyema sida agi bedau chukup umur, pengawa nyadi melaki bini nya ulih dipejalai nyema bisi pemendar ari ari kort sereta apai indai sida.
Beserimbai enggau nya, Rodziah madahka prosedur operasi standard (SOP) ke nyadi lalau ngagai akim sebedau tu ngemendarka pengawa nyadi melaki bini baruh umur iya nya ari baruh bidang kuasa Opis Kehakiman Syariah Malaysia, ukai ari opis menteri nya. — DayakDaily
