KUCHING 31 Dis: Akademi Serakup Dayak Iban Sarawak(ASADIA) sedia nerima kangau mandangka Taboh Ngambi Indu ba pengerami melah pinang.
Ketuai ASADIA, Mabong Unggang madah akademi nya diatu udah nempa mayuh orang ka landik ba bengkah taboh nya ti diatu udah jarang endar didinga.
Bedau lama tu tadi ku Mabong nambah, seraban pematih ASADIA bisi mandangka taboh nya ba pengerami melah pinang ke bisi diatur di siti hotel di Kuching ditu.
“Ari sukong enggau tempap jari mensia mayuh ti datai ngulu pengawa melah pinang nya mandangka sida iya temegah amat ninga bunyi taboh ngambi indu ti ditebah Raban Betaboh ASADIA.
“Bisi mega muji sereta madah ke enda kala ninga Taboh Ngambi Indu ngelamatu,”ku Mabong bejaku ngagai Dayak Daily.
Iya nambah perkara nya engka amat ketegal suah enti pengerami melah pinang ba kandang mengeri orang suah agi deka nyuwa ‘Band’ tauka ngena Karaoke aja.
“Tauka enti ngena taboh pan taboh ke suah didinga aja tauka suah agi ngena tebah taboh ngajat aja.
“Nya ngujungka tebah taboh ngambi indu nyau deka tenggelam sereta pupus,”ku iya.
Nitihka penerang Mabong, kelas Taboh Ngambi Indu ASADIA diajar John Nuga ke landik ba main asal Iban Kelebih agi betaboh.
Kelimpah ari ngajar Taboh Ngambi Indu, John Nuga mega ngajar Taboh Kuntau enggau Gendang Pampat.
Mabong ngarap agi bisi orang ti melah pinang ngangau ke ASADIA mantai ke Taboh Ngambi Indu ngambika ulih didinga,diperati sereta dititihka nembiak rebak baru.
