KUCHING, 26 Ogos: GPS deka nyabung chalun ba semua 82 sitak kunsil negeri maya Pengawa Bepilih Negeri Ke-12 (PRN12) ti disadang diatur sebedau bulan Julai 2021.
Chairman Gabungan Parti Sarawak (GPS) Datuk Patinggi Abang Johari Tun Openg madah, nadai penetap ti tau nagang GPS nyabung chalun ba semua sitak.
“Baka ke ditemu kitai Sarawak, GPS siti gempung ke bekuasa. GPS deka nyabung chalun ba semua 82 sitak,” ku Abang Johari ba aum pengarang berita di Miri seharitu.
Dulu agi ari nya, iya bisi nyuaka setipikit tanah nengah Seksyen 18, Kod Tanah Sarawak.
Iya mega madah, GPS enggau Perikatan Nasional (PN) udah bisi sempekat ba sentang pekara nya.
“Bedau bepilih agi, anti maya pengawa bepilih diatur sekalika Ali deka bediri ngarika Bersatu (Parti Pribumi Bersatu Malaysia) tauka enda. Tang kitai sigi udah bisi sempekat” ku Abang Johari.
Abang Johari ke mega Kepala Menteri ditanya pemberita sentang runding iya bekaul enggau sitak Krian ke dikuasai Ali, ke diatu udah nyereta Bersatu.
Krian nyadi sitak tradisyenal empu Parti Progresif Demokratik (PDP), siti parti dalam gempung GPS.
Ali nguasa sitak nya pengudah menang ba pengawa bepilih 2016 ngarika Parti Keadilan Rakyat (PKR).
Pengudah ‘Sheraton Move’ Ali ke nyukung ex-sapit president PKR Datuk Seri Azmin Ali, nitihka singkang Azmin nyereta Bersatu bedau lama tu tadi.
Ketegal Bersatu ba dalam gempung PN, entelah sapa ti deka bediri ba Krian nyadi isu diatu kelebih agi pengudah PDP keran deka ngambi sitak nya. — DayakDaily
