GPS meratka pemansang infrastruktur sereta ekonomi, ku Abang Johari

Abang Johari(megai menira) ngelanchar Bulan Kebangsaan enggau Kimpin Ngibar Jalur Gemilang 2020 Di Komplek DUN.

Oleh Chris Bishop

KUCHING, 28 JULAI: Perintah Gabungan Parti Sarawak(GPS) ngembuan penemu diak Sarawak meseti dulu meratka pekara ke diguna, kelebih agi ba sukut pemansang infrastruktur ke tau ngangkatka ekonomi negeri.

Kepala Menteri Datuk Patinggi Abang Johari Tun Openg madah, pengawa nyendia penyambung fisikal enggau ukai fisikal udah ransing dikereja dalam timpuh 2 taun tu lalu disambung dalam RMK12 nyentuk ngagai taun 2030.

“Nya alai, kelimpah ari Perintah Besai ngaga Jalai Besai Pan Borneo, Sarawak mega ngaga Jalai Tebing Tasik enggau Jalai Besai Kedua ti begunaka belanja RM11 bilion.

“Kandang menua pesisir mega dikemerat Perintah Negeri nengah projek infrastruktur ba kandang Ijinsi Pemansang Ulu Rejang(URDA), Ijinsi Pemansang Tanah Tinggi(HDA) sereta Ijinsi Pemansang Kandang Tunga Utara(NRDA) nengah agih belanja RM4.5 bilion,” ku iya.

Abang Johari mansutka jaku nya rambau ngelanchar Bulan Kebangsaan enggau Kimpin Ngibar Jalur Gemilang 2020 ke diatur di Komplek Dewan Undangan Negeri(DUN) seharitu.

Iya nambah, agih belanja ke besai tu disedia nengah chara ‘alternative funding’ alai Sarawak sigi enda ulih nganti tauka bepanggai enggau bajet ninting taun ari Perintah Besai.

Diatu ku Abang Johari, projek-projek infrastruktur di ketetiga kandang endur nya udah berengkah digaga ungkup pemaik rayat lalu nyadika sebengkah agi chara ti ulih ngangkatka ekonomi ba tetiap kandang endur.

Ngenang sentang bungkur internet, iya ngakun kandang menua pesisir kelebih agi ke mayuh bukit sigi enda mudah nerima arus internet.

“Perintah Negeri diatu enggau naka ulih nirika tiang telekomunikasyen alai nyentukka diatu lebih 170 tiang udah bediri ba selampur negeri. Tang, enti nadai pemekal servis, program tu enda nyapai juluk ke ditetap.

“Berindik enggai nya, Perintah Negeri ngatur intervensyen ngambi ulih nyendia servis nengah Sarawak Multi-Media Authority ti dikearap ulih meri sabsidi ngambika caj servis enda kelalu mar ungkup rayat di menua pesisir,” ku Abang Johari.-DayakDaily

Share this article!