KUCHING, 19 Julai: Gerija St Luke, Simanggang kena Hari Dua tu tadi bisi meri bantu piket pemakai sereta duit ngagai tiga pintu ruang bilik ti ditinggang penusah angus ba Punggu Tapang.
Bantu nya disadung bala raban Gerija betuaika Archdeacon Jackson Jarau sereta dikemata Tuai Rumah Philip.
Penatai bala raban Geriga ke Punggu Tapang endang deka ngabas lalu nanya ka berita sida ti dituntung penusah seraya meri jaku peransang ngagai sida.
Nitihka penerang Archdeacon Jackson, sigi tanggung pengawa raban gerija nyaup ngelempung penusah ti bisi ninggang bala raban Kristian ke dipegai sida.
Naka ke diatu, bala sida ke dituntung penusah nya diau ngenduh enggau bala kaban belayan diri, nganti ngentak ka rumah baru.
Archdeacon Jackson ngarap pengawa ngentak rumah baru nya ulih dirumban jampat ngambika ulih meri pengelantang ngagai sida ti benung tusut runding pengudah dituntung penusah ngenyit.
Kelimpah ari nya, Iya mega ngarapka sida ti tasah nya kering ati nempuh penguji tu.
Sama bela datai nyempulang Archdecon Jackson iya nya Reverend Rodriguez Unak, Sarap Bada, Vincent Sawing enggau Boniface Manggie. — DayakDaily
