Dikarang Chris Bishop
KUCHING, 20 April: Seraban orang ari “movement” Sarawak for Sarawakians (S4S) ngadu gempuru likun di Padang Merdeka ditu, seharitu.
Gempuru ke digulu urung 100 iku kaban S4S nya diatur enggau tuju mantah ubah ba Rang Undang-Undang (RUU) Genteran 1(2), Konstitusyen Federal.
Maya ke dibantai ba parlimen kena 9 April tu tadi, perambu ubah nya enda teulihka sukung majoriti dua pertiga kaban parlimen.
Ketuai Nembiak Parti Se’Ati Rakyat Sarawak (SUPP) Michael Tiang ke bela ngulu gempuru madah ngagai bala mayuh diak Sarawak mantah Malaysia baru ti diarika 13 negeri.
Ku iya, Sarawak semina dekaka Malaysia ke dulu suba ba maya ditumbuh ba taun 1963.
“Nama kebuah kitai Sarawak deka nyadi sebengkah negeri ari semua 13 negeri. Anang bepusin pusin sentang pekara tu,” ku iya ngelalau Pakatan Harapan (PH).
Tiang minta Perintah baru ngereja pengawa enggau lurus alai ba taun 2019, PH madah deka mulaika status Sarawak ke nyadi tiga bengkah menua ti numbuhka Malaysia.
“Tang sida enda nyebut pekara nya ba Konstitusyen Federal. Ba perambu ubah nya sida enda berani nulis kitai nyadi sebengkah menua ti numbuhka Malaysia, tiga kaling sekungsi ukai 13 negeri,” ku iya.
Berindik enggau nya Tiang ngelalau peranak Sarawak ngambi enda arapka jaku DAP.
DAP Sarawak betuaika Chong Chieng Jen ku iya majak mejal perintah Sarawak nyukung ubah RUU nya.
“Gabungan Parti Sarawak (GPS) sigi enda nyukung sereta nyain ubah RUU nya. Kitai ulih nganti nyentukka sida ngakun kitai sebengkah ‘Negara’ bepelasarka Sempekat Malaysia 1963 (MA63),” ku iya.
Gempuru ke berengkah jam 2 lemai nya mandangka bala kaban S4S ngayanka poster ke ditulis enggau jaku “Free Sarawak, Negara Sarawak, Referendum Hak Sarawak” enggau sekeda ke bukai. — DayakDaily
